قىتايدا قازاقستاننىڭ تۋريزمىن سيفرلى فورماتتا تانىستىردى
جۇزدەگەن جىلدان كەيىن ۇلى جىبەك جولى سيفرلى فورماتتا قايتا جاڭعىردى. بۇل جەردە ۋاقىت پەن كەڭىستىك زاڭى جۇرمەيدى. ەندى بەيجىڭنەن قازاقستانعا دەيىنگى 4 مىڭ شاقىرىم جولدى ۆيرتۋالدى كوزىلدىرىلىكتىڭ كومەگىمەن- اق ەڭسەرۋگە بولادى.
«جىبەك جولى گولوگرامماسى: قازاقستانعا سيفرلىق تۋريزم - تەحنولوگيالار مۇمكىندىكتەردى كەڭەيتەدى» اتتى كورمە قىتايدىڭ باس قالاسىندا اشىلدى. ونى ەلشىلىگىمىز بەيجىڭ عىلىمي- تەحنيكالىق قىزمەت كومپانياسىمەن بىرلەسىپ ۇيىمداستىردى.
«كورمەدە تولىقتىرىلعان جانە ۆيرتۋالدى شىندىق، كەڭىستىكتى مودەلدەۋ جانە باسقا دا تەحنولوگيالار قولدانىلدى. قىتايدىڭ عىلىمي- فانتاستيكالىق يندۋسترياسى ارقىلى ءبىز مادەني جانە تۋريزم سالالارىن جانداندىراتىنىمىزعا سەنىمدىمىز»، دەيدى، بەيجىڭ عىلىمي- تەحنيكالىق قىزمەت كومپانياسىنىڭ وكىلى چەن سياوحان.
ينتەراكتيۆتى ەكسپوزيتسيانى قىتاي استاناسىنىڭ تۇرعىندارى ءبىر اي بويى تاماشالاي الادى. جاڭا تەحنولوگيالار ارقىلى كەلۋشىلەر ەلىمىزدىڭ تاريحي كورىكتى جەرلەرىمەن، باي مادەنيەتى، قولونەرى جانە تاريحىمەن تانىسادى. ال كورمەنىڭ اشىلۋ سالتاناتىنا كەلگەن قوناقتار اسىق اتىپ، وينادى.
«مەن سيفرلى كورمە تۋرالى كەزدەيسوق ەستىپ قالىپ، كەلدىم. كوپتەگەن قىزىقتى دەرەكتەرمەن تانىستىم. قازاقستاننىڭ اۋاسى تازا، تابيعاتى تاڭعاجايىپ. ىندەت اياقتالعاننان كەيىن دوستارىممەن بىرگە قازاقستانعا ساياحاتتاۋدى جوسپارلاپ وتىرمىن»، دەيدى كورمەگە كەلۋشى جين سيۆەن. كورمەگە كەلۋشىلەر قازاقستان مەن قىتاي اراسىنداعى ەكىجاقتى ىنتىماقتاستىق تۋرالى دا بىلە الادى. جەكە تۇرعان ەكراندا 30 جىلدا ەكى ەل اراسىندا ديپلوماتيالىق قاتىناستاردىڭ دامۋىنىڭ ماڭىزدى كەزەڭدەرى جايلى اقپارات بەرىلگەن.
«زاماناۋي تەحنولوگيالار وتە وزەكتى، ولاردى پايدالانىپ، كوپ نارسە جاساۋعا بولادى. بۇگىن اشىلعان كورمە ۆيرتۋالدى بولسا دا، بارلىق بەينە وتە شىنايى. مەنىڭ ويىمشا، بۇل كورمەنى باسقا قالالاردا دا ۇيىمداستىرعان ءجون. مۇنداي شارالار وتە ماڭىزدى، سەبەبى بۇل ەلدەردىڭ ءوزارا بايلانىسىن ارتتىرۋعا كومەكتەسەدى»، دەيدى قىتايدىڭ قازاقستانداعى بۇرىنعى ەلشىسى ياو پەيشەن. كورمەنىڭ سالتاناتتى اشىلۋ راسىمىندە كىشكەنتاي ارتىستەر ونەر كورسەتىپ، ءان مەن كۇيدەن شاشۋ شاشتى. ال جاڭا ءارى قىزىقتى سيفرلى ءىس- شارا كەلۋشىلەردى ۆيرتۋالدى كورسەتىلگەن جەرلەردى شىنايى ومىردە بارىپ كورۋگە ىنتالاندىرىپ، قىزىعۋشىلىعىن وياتتى.
