ا ق ش تۇركيانى رەسەيگە سالىنعان سانكسيالارعا ۇرىنىپ قالماۋعا شاقىردى
گازەتتىڭ قولىنا ا ق ش قارجى ءمينيسترىنىڭ ورىنباسارى ۋوللي اديەمونىڭ تۇركياداعى امەريكا ساۋدا پالاتاسىنا جانە تۇرىكتىڭ ونەركاسىپ جانە بيزنەس اسسوتسياتسياسىنا جازعان حاتى تۇسكەن. حاتتا ا ق ش سانكسياسىنا ىلىككەن رەسەي كومپانيالارىمەن ىستەس بولعان تۇرىك كومپانيالارى ا ق ش سانكسياسىنا ءىلىنۋى مۇمكىن ەكەنى جازىلعان.
ۋوللي ادەمو تۇرىك بانكتەرىنە ايرىقشا توقتالعان.
«رەسەيدىڭ سانكسياداعى ازاماتتارىمەن جانە ۇيىمدارىمەن قارىم-قاتىناس تۇرىك قارجى ينستيتۋتتارى مەن بيزنەسىن سانكسياعا ىلىكتىرۋى مۇمكىن» دەيدى ول.
گازەت حاتتا «رەسەي بانكتەرىمەن بايلانىس ورناتقان تۇرىك بانكتەرى امەريكالىق بانكتەرمەن ىسكەرلىك قاتىناس ورناتا المايتىنى ايتىلعانىن» ناقتىلاي تۇسكەن.
بۇل ەسكەرتۋ - ۆاشينگتون تاراپىنان انكاراعا قىسىمنىڭ ۇلعايا تۇسكەنىن كورسەتەتىندەي. تۇركيا ۋكرايناعا باسىپ كىرگەنى ءۇشىن رەسەيگە سانكسيا سالعان باتىس ەلدەرىنە قوسىلماي وتىرعان ناتونىڭ جالعىز مۇشەسى. Wall Street Journal جازۋىنا قاراعاندا، «سونىڭ ناتيجەسىندە تۇركيا رەسەي كاپيتالى تىعىلاتىن جەرگە اينالعان».
وتكەن اپتانىڭ سوڭىندا ا ق ش قارجى مينيسترلىگى ا ق ش پەن تۇركيانىڭ قارجى ءمينيسترى ورىنباسارلارىنىڭ تەلەفونمەن سويلەسكەنىن، ۋوللي اديەمو رەسەي سانكسيانى اينالىپ ءوتۋى ءۇشىن تۇركيانى پايدالانا باستاعانىنا الاڭدايتىنىن حابارلاعان. تۇركيا قارجى ءمينيسترىنىڭ ورىنباسارى امەريكالىق ارىپتەسىن تۇرىك كومپانيالارى مەن ازاماتتارى حالىقارالىق سانكسيالاردى بۇزۋىنا جول بەرمەيتىنىنە سەندىرگەن.
«ازاتتىق»
