19:30, 23 - تامىز 2022 | GMT +5
موڭعوليا جەرىنەن قۇتلىق ەلتەرىس قاعاننىڭ كەشەنى تابىلدى
نۇر- سۇلتان. قازاقپارات - تۇركى حالىقتارى ءۇشىن مۇنداي قۋانىشتى جاڭالىقتى حالىقارالىق تۇركى اكادەمياسىنىڭ پرەزيدەنتى دارحان قىدىرالى ءوزىنىڭ Facebook پاراقشاسىندا ءسۇيىنشى سۇراپ، ءبولىستى.
«ءسۇيىنشى! حانعاي جوتاسىندا، وتۇكەن ايماعىندا كەرەمەت جاڭالىق اشىلدى.
حالىقارالىق تۇركى اكادەمياسى مەن موڭعوليا عىلىم اكادەمياسى ارحەولوگيا ينستيتۋتىنىڭ بىرىككەن عىلىمي ارحەولوگيالىق ەكسپەديتسياسى نومعون القابىندا كۇلتەگىن مەن بىلگە قاعاننىڭ اكەسى، تۇرىك قاعاندىعىن قايتا داۋىرلەتكەن ۇلى قۇتلىق ەلتەرىس قاعاننىڭ كەشەنى تابىلدى.
سالتاناتتى كەشەندە تابىلعان بىتىكتاستا تاريحىمىزعا بەتبۇرىس جاسايتىن تۇرىك جانە سوعدى جازۋىمەن ماتىندەر بار!»- دەپ جازدى ول.
سونداي- اق تابىلعان جادىگەرگە قاتىستى تولىق اقپارات ەرتەڭ ۇلان- باتىرداعى باسپا ءسوز ورتالىعىندا وتەتىن جيىندا جاريالاناتىنىن ايتتى.
