كۇزگە قاراي ەلىمىزگە قانت جەتكىزۋ جاعدايى تۇراقتالىپ، باعا تۇسەدى – ا ش م

نۇر-سۇلتان. قازاقپارات – ق ر اۋىل شارۋاشىلىعى مينيسترلىگى ەلدەگى قانت تاپشىلىعى مەن باعاعا قاتىستى الداعى ۋاقىتقا بولجام جاسادى، دەپ حابارلايدى قازاقپارات ءتىلشىسى.

«قانت تاپشىلىعى مەن باعانىڭ ءوسۋى قازاقستانعا اتالعان ءونىمنىڭ ەداۋىر بولىگىن جەتكىزۋشى رەسەيدىڭ قانت ەكسپورتىنا تىيىم سالۋىمەن بايلانىستى ەكەنى بەلگىلى. جاعدايدى تۇراقتاندىرۋ ءۇشىن قازاقستاندىق قانت زاۋىتتارىنا 350 مىڭ توننا كولەمىندە شيكى قۇراق قانتىن جانە قۇرامىندا قانت بار ءونىم وندىرەتىن كاسىپورىندار ءۇشىن دايىن قانتتى ءۇشىنشى ەلدەردەن باجسىز اكەلۋگە كۆوتا بەكىتىلدى. ءۇشىنشى ەلدەردەن اكەلىنەتىن باجسىز قانت وتاندىق نارىققا ايتارلىقتاي كولەمدە جەتكىزىلىپ جاتىر. بۇل ىشكى نارىقتاعى جاعدايدى ەداۋىر تۇراقتاندىردى»، - دەگەن مينيسترلىكتەن رەسمي جاۋاپ كەلدى قازاقپارات جولداعان ساۋالعا.

سونداي-اق، مينيسترلىك ەلىمىزدىڭ وڭتۇستىك وڭىرلەرىندەگى قانت زاۋىتتارى ءونىم جيناۋدى باستاپ، قانت ءوندىرىسىن قايتا جانداندىراتىنىنا سەنىم ارتىپ وتىر. ايتۋلارىنشا، وتاندىق وندىرۋشىلەر ىشكى نارىقتى قانتپەن قامتۋدا سەپتىگىن تيگىزەدى.

«ودان بولەك، بيىل 1- قىركۇيەكتە رەسەيدە قانت ەكسپورتىنا تىيىم سالۋ مەرزىمى اياقتالادى. سونىمەن قاتار بيىل كورشى ەلدە قانت قىزىلشاسى بويىنشا جاقسى ءونىم بولادى دەپ كۇتىلۋدە. وسى ورايدا قازاقستانعا وتكەن جىلدارعا قاراعاندا ارتىق كولەمدە رەسەي قانتى جەتكىزىلەدى دەپ جوسپارلانىپ وتىر. جوعارىدا اتالعان جاعدايلاردى ەسكەرە وتىرىپ كۇزگە قاراي ەلىمىزگە قانت جەتكىزۋ جاعدايىنىڭ تۇراقتالاتىنى ءسوزسىز. سول سياقتى نارىقتاعى ۇسىنىستىڭ ۇلعايۋىنا بايلانىستى باعا دا وبەكتيۆتى تۇردە تومەندەيتىن بولادى. الايدا، قازىر باعانىڭ قانداي بولاتىنىن ناقتى ايتۋ مۇمكىن ەمەس. ويتكەنى، باعاعا كوپتەگەن فاكتور اسەر ەتەدى»، - دەيدى ۆەدومستۆودان.