مينيستر ءبيداي مەن ۇننىڭ باعاسىنا بولجام جاسادى
بۇل تۋرالى ق ر اۋىل شارۋاشىلىعى ءمينيسترى ەربول قاراشوكەيەۆ ايتتى، دەپ حابارلايدى قازاقپارات ءتىلشىسى.
«بۇعان دەيىن كوكتەمدە، كۇزدە قازاقستاندا ءبيداي، ۇن تاپشىلىعى قاتتى سەزىلەدى دەگەن اڭگىمە شىققان ەدى. قازىرگى جاعداي قالاي؟ قىستا قازاقستاندا ۇن تاپشىلىعى بولماي ما؟ وسى بويىنشا قانداي ءىس-شارالار جۇرگىزىلىپ جاتىر؟»، - دەگەن سۇراق قويىلدى ۇكىمەتتەگى باسپا ءسوز ءماسليحاتىندا.
ەربول قاراشوكەيەۆ ءوز جاۋابىندا ەلدەگى ءبيداي قورى جەتكىلىكتى ەكەنىن، تاپشىلىققا ەش نەگىز جوقتىعىن ايتتى.
«ءوزىمىز ساناپ كورەيىكشى، بيىل 13,4 ميلليون توننا ءبيداي جينايمىز. بىلتىرعى ءبيدايدان 2,5 ميلليون توننا قالدىق قالدى. ونىڭ ىشىندە 360 مىڭ توننا ءبيداي «ازىق-تۇلىك كەلىسىمشارت» كورپوراتسياسى قورىندا تۇر. ءبيدايدىڭ ەلدەگى تۇتىنىلىپ وتىرعان كولەمى - 6-7 ميلليون توننا. سوندىقتان الداعى ۋاقىتتا جينالاتىن ءبيداي مەن قورداعى ءبيدايدى ەسەپتەڭىز. ول تۇتىنىلاتىن ءبيدايدىڭ كولەمىنەن بىرنەشە ەسەگە اسىپ تۇر. سوندىقتان ءبيداي مەن ۇن تاپشىلىعى بولادى دەۋگە نەگىز جوق»، - دەدى اۋىل شارۋاشىلىعى ءمينيسترى.
مينيستر جوعارى ساناتتى ۇننىڭ باعاسى ءوسۋى مۇمكىن دەگەن ماسەلەگە دە توقتالدى.
«قازىر نارىقتا ءبيدايدىڭ باعاسى ارزانداپ جاتىر. ەكى-ەكى جارىم اي بۇرىن ءبيدايدىڭ باعاسى 175-180 تەڭگەگە دەيىن كوتەرىلگەن ەدى. قازىر رەسەي فەدەراتسياسىنان ءبيداي ەكسپورتى اشىلىپ، ەلىمىزگە 1,2 ميلليون توننا ءبيداي ەكسپورتتالادى دەگەن بولجام بولدى. وزىمىزدە جانە وڭتۇستىكتە ءبيداي جيناۋ ناۋقانىن بىتىردىك. استىقتى جيناپ الدىق. قازىر سولتۇستىك وڭىرلەردە جاپپاي استىق جيناۋ ناۋقانى باستالدى. جوسپارىمىز دۇرىس. سوندىقتان ءبيدايدىڭ باعاسى 145-150 تەڭگەگە دەيىن تومەندەدى. وسىعان قاراماستان ءبىز «ازىق-تۇلىك كەلىسىمشارت» كورپوراتسياسى تاراپىنان ارزانداتىلعان ءبيدايدى وڭىرلەرگە جىبەرىپ جاتىرمىز. ول الەۋمەتتىك نان باعاسىن تۇراقتى ۇستاپ تۇرۋعا مۇمكىندىك بەرەدى. سوندىقتان جاعداي تۇراقتى. قازىر نارىقتىڭ ديناميكاسىنا قاراعاندا ءبيداي مەن ۇننىڭ باعاسى ءسال تومەندەيدى دەپ بولجام جاساپ وتىرمىز. سوندىقتان قازاقستانداعى ءبيدايدىڭ قورى جەتكىلىكتى. ۇنسىز قالمايمىز»، - دەدى ەربول قاراشوكەيەۆ.
