كولىك جىلدامدىعىن اسىرۋ سالدارىنان مىڭنان استام جول- كولىك وقيعاسى بولدى
بۇل تۋرالى ق ر ىشكى ىستەر مينيسترلىگى اكىمشىلىك پوليتسيا كوميتەتى ءتوراعاسىنىڭ مىندەتىن اتقارۋشى جاندوس مۇراتاليەۆ ءمالىم ەتتى، دەپ حابارلايدى قازاقپارات ءتىلشىسى.
«جول- كولىك وقيعالارىنىڭ بەلگىلى ءبىر بولىگى جىلدامدىقتى ەلەمەيتىن جۇرگىزۋشىلەردىڭ كەسىرىنەن بولادى. ءاربىر جەتىنشى اپات (%14) جۇرگىزۋشىلەردىڭ ەلدى مەكەندە بەلگىلەنگەن جىلدامدىقتى ساقتاماۋىنان بولىپ جاتادى. جول- كولىك وقيعالارىندا مەرت بولعانداردىڭ جالپى سانىندا ءاربىر جەتىنشىسىنىڭ (%13) ءومىرى وسى سەبەپتەن قيىلادى جانە ءاربىر جەتىنشى (%14) جاراقات الادى»، - دەدى ج. مۇراتاليەۆ مينيسترلىكتە وتكەن بريفينگىدە.
ونىڭ ايتۋىنشا، سوڭعى 7 ايدا وسى جىلدامدىقتى اسىرۋ سەبەبىنەن 1136 جول-كولىك وقيعاسى تىركەلگەن. ج ك و سالدارىنان 156 ادام قايتىس بولدى جانە 1442 ادام جاراقات الدى.
بۇدان بۇرىن حابارلانعانداي، 2022 -جىلى قازاقستاندا جول- كولىك اپاتتارى كوبەيدى.
