قازاقستاندا پەداگوگتەرگە سۇرانىس ارتتى - ەڭبەك نارىعىنداعى ستاتيستيكا
مينيسترلىك اقپاراتىنا سايكەس، بيىلعى شىلدە ايىندا ەلەكتروندىق ەڭبەك بيرجاسىندا (ە ە ب) بوس جۇمىس ورىندارى تۋرالى 87 مىڭ مالىمەت جانە 70,6 مىڭ تۇيىندەمە ورنالاستىرىلدى. ماۋسىم ايىمەن سالىستىرعاندا بوس ورىندار سانى 30 پايىز تومەندەپ، وزەكتى تۇيىندەمەلەر سانى 18 پايىز ارتقان. سونداي- اق ەڭبەك نارىعىنىڭ ماۋسىمدىق ەرەكشەلىكتەرى ەسەبىنەن بىلىكتىلىگى تومەن كادرلارعا سۇرانىس ازايعان.
وڭىرلەر بويىنشا جۇمىس بەرۋشىلەر تاراپىنان ۇسىنىس تومەندەدى: جامبىل وبلىسىندا - 71 پايىز، قىزىلوردا وبلىسىندا - 55 پايىز، اقتوبە وبلىسىندا - 52 پايىز جانە سولتۇستىك قازاقستان وبلىسىندا 48 پايىز. ۇسىنىس ارتتى: باتىس قازاقستان جانە الماتى وبلىستارىندا - تيىسىنشە 13 پايىز جانە 4 پايىز.
«وقۋ كەزەڭىنىڭ باستالۋىنا بايلانىستى ورتا جانە مەكتەپكە دەيىنگى ءبىلىم بەرۋ مەكەمەلەرىندە كادرلارعا دەگەن سۇرانىس جوعارى: قازىرگى ۋاقىتتا قاجەتتىلىك 10,2 مىڭ بوس جۇمىس ورنىن نەمەسە بارلىق بوس جۇمىس ورىندارىنىڭ 12 پايىز قۇرايدى. بوس جۇمىس ورىندارىنىڭ كوپشىلىگى قاراعاندى (899 بوس ورىن)، جامبىل (792 بوس ورىن) جانە الماتى (737 بوس ورىن) وبلىستارىندا ورنالاستىرىلدى. جالپى قازاقستان بويىنشا مۇعالىمدەردىڭ ورتاشا جالاقىسى 109,4 مىڭ تەڭگەنى قۇرايدى»، - دەدى «ەڭبەك رەسۋرستارىن دامىتۋ ورتالىعى» ا ق باسقارۋشى ديرەكتورى الەكساندرا مولچانوۆسكايا.
سۇرانىسقا يە ماماندار رەيتينگىسىندە ەكىنشى ورىندا اۋىل شارۋاشىلىعى جانە تۇرعىن ءۇي قۇرىلىسى كاسىپورىندارى (4 مىڭ بوس جۇمىس ورنى نەمەسە 5 پايىزدان) تۇر. بۇل رەتتە اۋىل شارۋاشىلىعى سالاسىنداعى بوس ورىنداردىڭ 36 پايىز تۇركىستان وبلىسىنا تيەسىلى، ال قۇرىلىس سالاسىنداعى ۆاكانسيالاردىڭ جارتىسىنا جۋىعى (43 پايىز) نۇر-سۇلتان قالاسىندا جاريالانعان.
وسى جىلدىڭ شىلدە ايىندا بىلىكتىلىگى تومەن قىزمەتكەرلەرگە سۇرانىس وتكەن ايمەن سالىستىرعاندا 2 ەسەگە - 50,6 مىڭنان 28,7 مىڭعا دەيىن ازايدى. ال ۇسىنىس 11 پايىز، ياعني 29,1 مىڭنان 25,8 مىڭعا دەيىن تومەندەدى.
ۆەدومستۆو مالىمەتىنشە، ورتا بىلىكتى ماماندارعا ارنالعان ۆاكانسيا سانى ۇسىنىستان 1,7 ەسە اسىپ ءتۇستى: 38,9 مىڭ بوس ورىن، 23,6 مىڭ تۇيىندەمە.
بوس جۇمىس ورىندارى مەن تۇيىندەمەلەر اراسىنداعى ەڭ ۇلكەن الشاقتىق، ياعني مامان دەفيتسيتى جوعارى وقۋ ورىندارىنىڭ وقىتۋشىلارى اراسىندا بايقالادى: ۆاكانسيا – 1331، تۇيىندەمە – 945، سونداي- اق دارىگەرلەر بويىنشا بوس ورىن – 1772، تۇيىندەمە - 605, كۇزەتشىلەر بويىنشا بوس ورىن – 1685، تۇيىندەمە - 463 جانە تاربيەشىلەر بويىنشا بوس ورىن – 1450، تۇيىندەمە - 990.
كەرىسىنشە، پروفيتسيت زاڭگەر (1143 بوس ورىنعا 331 تۇيىندەمە)، ەكونوميست (182 بوس ورىنعا 457 تۇيىندەمە)، فەلدشەر (174 بوس ورىنعا 735 تۇيىندەمە)، ۆاحتەر (130 بوس ورىنعا 864 تۇيىندەمە)، كۋرەر (123 بوس ورىنعا 465 تۇيىندەمە) جانە بىلىكتى ەمەس جۇمىسشىلارعا (1245 تۇيىندەمەگە 644 بوس ورىن) بايقالادى.
جۇمىس ىزدەۋشىلەر ەڭ كوپ وڭىرلەر: شىمكەنت قالاسىندا - 6 مىڭ تۇيىندەمە، جامبىل وبلىسىندا 5,5 مىڭ تۇيىندەمە، اقتوبە وبلىسىندا 4,7 مىڭ تۇيىندەمە، الماتى قالاسىندا 3,5 مىڭ تۇيىندەمە.
ءبىر ايدا تۇيىندەمەلەردىڭ جالپى سانى مۇعالىمدەردەن 2,3 ەسەگە (2,8 مىڭنان 6,5 مىڭعا دەيىن تۇيىندەمە)، زاڭگەرلەردەن - 1,7 ەسەگە (677-دەن 1143 تۇيىندەمەگە دەيىن) جانە تاربيەشىلەردەن 1,6 ەسەگە (609-دان 990 تۇيىندەمەگە دەيىن) كوبەيدى.
ەڭ جوعارى جالاقى العىسى كەلەتىن ماماندار دا بەلگىلى بولدى، ءوز تۇيىندەمەسىندە اۆياتسيا ينجەنەرلەرى- 3,3 ميلليون تەڭگە ەڭبەكاقى كورسەتكەن. سونداي- اق جوعارى بۋىن باسشىلارى - 2 ميلليون تەڭگە، باس اۋديتورلار، عارىش ينجەنەرلەرى، باس ديرەكتورلار ايىنا 1 ميلليون تەڭگە تابىس تاپقىسى كەلەدى.
جۇمىس بەرۋشىلەر تاراپىنان ۇسىنىلىپ وتىرعان جالاقى: ۇشقىشتارعا ورتاشا ەسەپپەن - 900 مىڭ تەڭگە، باس قۇرىلىسشىلارعا - 700 مىڭ تەڭگە، جوندەۋ - مەحانيكالىق شەبەرحاناسىنىڭ مەڭگەرۋشىلەرىنە جانە بۇرعىلاۋ جونىندەگى سۋپەرۆايزەرلەرگە - 600 مىڭ تەڭگە.
«جۇمىس ىزدەۋشىلەر تاراپىنان بەلسەندىلىكتىڭ وسۋىنە جانە جۇمىس بەرۋشىلەردەن سۇرانىستىڭ تومەندەۋىنە قاراماستان، كەيبىر كادرلارعا جالپى تاپشىلىق ايقىن. بىلىكتىلىگى تومەن ىزدەنۋشىلەر تاراپىنان بايقالىپ وتىرعان قىزىعۋشىلىقتىڭ باسەڭدەۋى ماۋسىمدىق جۇمىستارمەن بايلانىستى»، - دەلىنگەن مينيسترلىك اقپاراتىندا.
رەداكتور گۇلميرا الياكپاروۆا
