ەكولوگيا ءمينيسترى كيىكتەر تۋرالى: كەلەسى جىلى اقىلى اڭشىلىق باستالۋى مۇمكىن

نۇر-سۇلتان. قازاقپارات - قازاقستاندا كيىك سانىن رەتتەۋ ماسەلەسى قازان ايىندا شەشىلەدى.

بۇل تۋرالى ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ ايتتى، دەپ حابارلايدى قازاقپارات ءتىلشىسى.

«بۇل ماسەلە بويىنشا ءالى ناقتى شەشىم قابىلدانعان جوق. ءبىز قازىر كوپشىلىكتەن كەلىپ تۇسكەن ۇسىنىستاردى قاراستىرىپ جاتىرمىز. ماسەلەن، ادامدار كيىكتەردى اتپاي، باسقا وڭىرلەرگە ماجبۇرلەپ كوشىرۋدى ۇسىنعان ەدى. وكىنىشكە وراي، عىلىمي قاۋىمداستىق بۇل ءادىستى ءتيىمسىز دەپ اتادى، ويتكەنى ماجبۇرلەپ ايداعاندا كيىكتەردىڭ ءولۋ قاۋپى جوعارى جانە ولار تاريحي مەكەنىنە قايتىپ كەلۋى مۇمكىن. سوندىقتان بۇل ۇسىنىس قابىلدانبادى»، - دەدى س. برەكەشيەۆ ۇكىمەت ۇيىندە وتكەن باسپا ءسوز ءماسليحاتىندا.

سونداي- اق قاسقىرلاردىڭ سانىن كوبەيتۋ ۇسىنىستارى كەلىپ تۇسكەن، مينيستر مۇنىڭ دا كيىكتەر سانىن ءبىر مەزەتتە رەتتەي قويمايتىنىن ايتتى.

«نەگىزىنەن قاسقىردى «ورمان سانيتارى» دەپ اتايدى، ول ءالسىز، اۋرۋ جانۋارلاردى تارتىپ جەپ، پوپۋلياتسيا قۇرامىن جاقسارتىپ، كيىك سانىن كەرىسىنشە كوبەيتىپ جىبەرەدى. قازىر اۋىل شارۋاشىلىعى مينيسترلىگىمەن، قازاقستاننىڭ اگروساقتاندىرۋ قاۋىمداستىعىمەن بىرلەسىپ، جايىلىمدار مەن ەگىستىكتەردى اگروساقتاندىرۋ، كيىك تاپتاۋىنان اۋىل شارۋاشىلىعىنا كەلتىرىلگەن زالالدى باعالاۋ ادىستەمەسىن ازىرلەۋدى قاراستىرىپ جاتىرمىز. نەگىزىندە ساقتاندىرۋشىلاردا بۇل ماسەلە بويىنشا بەلگىلى ءبىر تۇسىنىك بار، سوندىقتان وسى باعىتتاعى جۇمىس جالعاسۋدا»، - دەدى س. برەكەشيەۆ.

سونىمەن بىرگە سپيكەر باتىسقازاقستاندىق شارۋالاردىڭ ماسەلەلەرى مەن شاعىمدارى وزدىگىنەن شەشىلگەنىن ايتتى، ويتكەنى كيىك - كوشىپ- قوناتىن جانۋار، بۇگىنگى كۇنى ولار وسى اۋداننان ءوز جولدارى بويىنشا كوشىپ كەتتى. سوندىقتان قازىر ەگىستىكتى تاپتاۋ سياقتى پروبلەما جوق.

«دەگەنمەن، ءبىز قازىر عىلىم مينيسترلىگىمەن بىرلەسىپ، بەلگىلى ءبىر جۇمىس جۇرگىزىپ جاتىرمىز. كۇزدە اناليز جۇرگىزۋ ءۇشىن 500 كيىك اۋلانادى، ولار اتۋ جولىمەن الىنبايدى. كيىكتەر ءتىرى كۇيىندە ۇستالادى، تالدامالار الىنىپ، بارلىق كيىك تابيعاتقا شىعارىلادى. سونداي- اق ءبىز كەلەسى جىلعا سپورتتىق- اۋەسقويلىق اڭ اۋلاۋ ۇيىمداستىرۋدى قاراستىرامىز. بۇل اقىلى اڭشىلىق بولادى. نەگىزىندە، بۇعان دەيىن ءبىز اقبوكەننىڭ قىزىل كىتاپقا ەنبەگەنىن ايتقان بولاتىنبىز. كيىك اۋلاۋعا تىيىم 2023 -جىلدىڭ 1-قاڭتارىنا دەيىن سالىنعان. بۇل ماسەلەلەر قازىر قارالىپ جاتىر، جاقىن ارادا، قازان ايىنىڭ سوڭىنا دەيىن ناقتى ءبىر شەشىمگە كەلەمىز»، - دەدى سەرىكقالي برەكەشيەۆ.

ەسكە سالساق، بۇعان دەيىن مينيستر سەرىكقالي برەكەشيەۆ كيىك سانى رەتسىز كوبەيسە، پاستەرەللёز سىندى اۋرۋلاردىڭ قاۋپى ارتاتىنىن ايتتى. قازاقستان فەرمەرلەرى كيىك تاپتاعان القاپتاردان 200 مىڭ توننا استىق جوعالتۋى مۇمكىن.

اۆتور ايجان سەرىكجان قىزى