وبلىس اكىمىنىڭ ورىنباسارى وتستاۆكاعا ءوتىنىش بەردى

دەگەنمەن ءوڭىر اكىمى ونى قابىلدامادى. بۇل تۋرالى پاۆلودار وبلىسى اكىمىنىڭ باسپا ءسوز قىزمەتى ءمالىم ەتتى، دەپ حابارلايدى قازاقپارات ءتىلشىسى.

اكىمدىك دەرەگىنشە، وتستاۆكاعا كەتۋ ءوتىنىشىن بەرگەن ايزادا قۇرمانوۆا ءبىلىم بەرۋ، دەنساۋلىق ساقتاۋ، مادەنيەت، جاستار ساياساتى جانە الەۋمەتتىك سالالارعا جەتەكشىلىك ەتەدى.

«ايزادا قۇرمانوۆانىڭ قاراماعىنداعى مادەنيەت، تىلدەردى دامىتۋ جانە ارحيۆ ءىسى باسقارماسىنىڭ بۇرىنعى باسشىسى سىبايلاس جەمقورلىق فاكتىسى بويىنشا ايىپتالدى. تيىسىنشە، پارا العان قىزمەتكەرگە قاتىستى شىققان ۇكىم كۇشىنە ەندى. سوندىقتان اكىمنىڭ ورىنباسارى وتستاۆكاعا كەتپەك بولعان. دەگەنمەن وبلىس باسشىسى ءابىلقايىر سقاقوۆ ونى قابىلداماي، ورنىنا قاتاڭ سوگىس جاريالادى»، - دەلىنگەن اكىمدىكتىڭ باسپا ءسوز قىزمەتى تاراتقان حابارلامادا.

ەسكە سالايىق، بۇعان دەيىن ورىنباسارىنىڭ جەمقورلىعى ءۇشىن ەكىباستۇزدىڭ اكىمى وتستاۆكاعا كەتكەن بولاتىن.

اۆتور ءاليحان اسقار