تۇركىستان وبلىسىندا ون جىل بۇرىن سالىنعان مەكتەپ اپاتتى دەپ تانىلدى
جەتى قازىنا اۋىلىنداعى جالعىز مەكتەپتە 250 بالا وقيدى. مەكتەپ اكىمشىلىگى ەكى جىل بۇرىن عيماراتتىڭ ءبىر بولىگىن ىرگەتاسى وتىرعان سوڭ، ءقاۋىپتى دەپ جاۋىپ تاستاعانىن ايتادى. ال، بيىل جارىقتار مۇلدە كوبەيىپ كەتىپتى. جىل سايىن قۇرىلىس سالعان كومپانيا وكىلدەرىن جىلدا شاقىرتامىز دەيدى. ال، بيىل شاتىردان اققان سۋدان بولمەلەردىڭ قابىرعالارى كوگەرتىپ، كافەلدەرى ءتۇسىپ جاتىر ەكەن. جارىقتاردىڭ اراسى اشىلىپ، ادام شوشىرلىق جاعدايعا جەتكەن.
«ىرگەتاسى جارتى مەترگە وتىردى عوي. قورقاتىنداي جاعدايعا جەتتى. قابىرعالار جارىلىپ جاتىر، سوگىلىپ جاتىر. ءبىر جەرىن جاماساق، ەكىنشى جەرى كەتىپ جاتىر. ول جەردى جاماساق، باسقا جاعى كەتەدى. كەيبىر بولمەلەرگە بارساڭىز كوپ اشىلىپ كەتكەن»، - دەيدى مەكتەپتىڭ قىزمەتكەرى مولداتىلەۋ سانايەۆ.
ءبىلىم ۇياسىنىڭ قۇرىلىس بارىسىن كوزبەن كورىپ، باسى- قاسىندا جۇرگەن اۋىل اقساقالى نۇرقوزى مامبەتوۆ بۇل مەكتەپكە بالا وقىتۋ ءقاۋىپتى دەگەن پىكىردە. سەبەبى ىرگەتاسى دا، قابىرعاسى دا تالاپتارعا ساي قالانباعان دەيدى. اقساقالدىڭ سوزىنشە، مەكتەپتى سالىپ بىتكەننەن كەيىن ءبىر جىلدان كەيىن- اق قابىرعالارى جارىلا باستاعان. ءقازىر ەسىكتەرى جابىلماي، جاڭبىر جاۋسا سۋ اعاتىن جاعدايعا جەتكەن. بولماعان سوڭ مەردىگەر ءوز ەسەبىنەن جوندەۋ جۇرگىزۋدە.
«مەكتەپتىڭ ىرگەتاسى قۇيىلعاندا تەمىرجولداعى قيىرشىق تاستاردى، نۇقىل توپىراقتاردى توكتى. مىنا جەردە فۋندامەنت جوق استىندا. مۇنى ءداۋ- ءداۋ حولل ۇقساتىپ ىستەگەن داعى، ورتاسىنان جارتى قىشتان ءورىپ شىعا سالعان. مىنا فۋندامەنتتى قۇيىپ جاتقاندا دا اراسىنا ارماتۋرانى كەم سالدى. سالعان جەرىنە سالدى، سالماعان جەرىنە قالدى. جەلدەتكىشى جوق استىندا، بولماعاننان كەيىن ەدەندەرى ءشىريدى»، - دەيدى نۇرقوزى مامبەتوۆ.
مەكتەپ باسشىلىعى بالالاردىڭ ومىرىنەن قاۋىپتەنىپ، بيىل تەحنيكالىق ساراپتاما جاساتقان. ونداعى ماماندار مەكتەپتى اپاتتى دەپ تانىپ، ءسۇرۋ كەرەك دەگەن قورتىندى جاساپتى. سوعان قاراماستان اۋداندىق ءبىلىم ءبولىمىنىڭ باسشىلىعى جاڭا وقۋ جىلىندا بالالاردى وسى مەكتەپتە وقىتپاق.
«2022 -جىلعى شىلدە ايىندا الىنعان تەحنيكالىق قورتىندىدا بۇل مەكتەپتى اپاتتى جاعدايدا دەپ تانىدى داعى، جوندەۋ جۇمىستارىنا وتە كوپ قارجى كەتەتىنىن جانە سوعان وراي ونى اپاتتى دەپ تانۋ تۋرالى شەشىم قابىلدانعان. مەردىگەر تاراپىنان قازىر جوندەۋ جۇمىستارى اياقتالعان جاعدايدا مەكتەپتە ءبىز وقىتاتىن بولامىز»، - دەيدى جەتىساي اۋداندىق ادامي الەۋەتتى دامىتۋ ءبولىمىنىڭ باسشىسى تۇرسىن مىرزاليەۆ.
ءبىر قىزىعى اپاتتى مەكتەپتىڭ قۇرىلىسىن جۇرگىزگەن كومپانيا بيىل ماقتاارال مەن جەتىساي اۋداندارىندا تاعى جەتى مەملەكەتتىك نىساننىڭ عيماراتىن سالىپ جاتىر. ونىڭ ۇشەۋى ءبىلىم ۇيالارى بولىپ تابىلادى. ال، جەتى قازىنا اۋىلىنداعى اتا- انالار بولسا بيىل اپاتتى مەكتەپكە بالالارىن جىبەرۋدەن ۇرەيلەنىپ وتىر. كورشى اۋىلدارعا تاسىمالداپ وقىتسا دا قاۋىپسىز جەردە ءبىلىم السا دەيدى.
