استاناداعى مەترو ءىسى: بىرنەشە تۇلعاعا قاتىستى قىلمىستىق ءىس سوتقا جولداندى

نۇر-سۇلتان. قازاقپارات - ر. م. امانجولوۆ جانە باسقا دا تۇلعالارعا قاتىستى قىلمىستىق ءىس سوتتا قارالادى، دەپ حابارلايدى قازاقپارات ءتىلشىسى نۇر-سۇلتان قالاسى سوتىنىڭ باسپا ءسوز قىزمەتىنە سىلتەمە جاساپ.

«ر. م. امانجولوۆ جانە باسقا دا تۇلعالارعا قاتىستى قىلمىستىق ءىس نۇر-سۇلتان قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ءىس جۇرگىزۋىنە قابىلداندى»، - دەلىنگەن ەلوردا سوتىنىڭ باسپا ءسوز قىزمەتى تاراتقان حابارلامادا.

اتالعان قىلمىستىق ىسكە قاتىستى الدىن الا تىڭداۋ 2022-جىلعى 24- تامىز ساعات 10:00 گە بەلگىلەنگەن.

ەسكە سالساق، ەلورداداعى LRT- نىڭ قۇرىلىسى 2019-جىلى ساۋىردە توقتاتىلعان ەدى.

2020-جىلدىڭ قاڭتارىندا LRT قۇرىلىسىنا قاتىستى ءىستى تەرگەۋ شارالارى اياقتالدى.

سول جىلى قازاندا «استانا LRT» كومپانياسى بويىنشا ءىس سوت قاراۋىنا جولداندى.

سونداي-اق، بيىل 13- تامىزدا نۇر-سۇلتان قالاسىنىڭ پروكۋراتۋراسى ەلوردا اكىمىنىڭ بۇرىنعى ورىنباسارى قانات سۇلتانبەكوۆ پەن «استانا LRT» ج ش س باسقارما ءتوراعاسى تالعات اردانعا قاتىستى قىلمىستىق ءىستى سوتقا جولداعانى تۋرالى حابارلادى.

ايتا كەتسەك، مەملەكەت باسشىسى قاسىم-جومارت توقايەۆ بيىل 11- قاڭتاردا وتكەن ءماجىلىس وتىرىسىندا ەلورداداعى LRT قۇرىلىسى تۋرالى پىكىر بىلدىرگەن ەدى.

«كوپشىلىكتى، اسىرەسە ەلوردا تۇرعىندارىن اشۋلاندىراتىن تاعى ءبىر ماسەلە – ل ر ت قۇرىلىسى بولىپ وتىر. ول كادىمگى ينفراقۇرىلىمدىق جوبادان ەلدىڭ ابىروي-بەدەلىنە نۇقسان كەلتىرەتىن كۇردەلى پروبلەماعا اينالدى. قازىردىڭ وزىندە وراسان زور قاراجات جۇمسالدى، قارىزدار تارتىلدى، شەتەلدىك ارىپتەستەر الدىندا اۋقىمدى كەلىسىمشارتتىق مىندەتتەمەلەر قابىلداندى. بۇل جوبا باستاپقىدا-اق ۇلكەن قاتەلىك بولدى، ونى مويىنداۋ كەرەك. سونىمەن قاتار، بۇل سىبايلاس جەمقورلىقتىڭ ءيىسى مۇڭكىپ تۇرعان جوبا»، - دەگەن ەدى پرەزيدەنت.