شىعىس قازاقستاندا ساق پاتشاسى جىلقىسىنىڭ التىن اشەكەيلەرى تابىلدى
ش ق و اكىمدىگىنىڭ مالىمەتىنە سۇيەنسەك، ءوڭىر اۋماعىندا قازبا جۇمىستارىن جۇرگىزىپ جاتقان ارحەولوگ زەينوللا ساماشيەۆتىڭ توبى كەزەكتى رەت عىلىمي جاڭالىق اشىپ وتىر. عالىمدار كۇرشىم اۋدانىنداعى وبانى قازۋ بارىسىندا ات ابزەلىنە ارنالعان التىن اشەكەيلەردى تاپتى.
«جىلقىنىڭ ساق تايپاسىنان شىققان پاتشاعا تيەسىلى بولعانى انىقتالىپ وتىر. بۇل - ەرەكشە ادەمى اشەكەي. وكىنىشكە قاراي، قورعاننىڭ ءوزى تونالعان بولىپ شىقتى، ءبىراق ەكى جاسىرىن ورنى ساقتالعان. سونداي- اق العاش رەت مەتالل ۇزەڭگى تابىلدى، وندا بارىسپەن اڭ اۋلاۋ ءساتى بەينەلەنگەن. اتالعان جادىگەرلەر وسكەمەندەگى مۇراجايعا قويىلدى»، - دەدى وبلىس اكىمى دانيال احمەتوۆ.
بۇدان بولەك، ارحەولوگتار مۋزىكانت- جاۋىنگەردىڭ كەسكىن- كەلبەتىن جانە ەجەلگى مۋزىكالىق اسپاپتاردى قالپىنا كەلتىردى. ولار تارباعاتاي اۋدانى ەلەكە سازى القابىنداعى قورعانداردىڭ بىرىنەن تابىلعان بولاتىن.
«قازبا جۇمىستارى ءالى دە جالعاسىپ جاتىر. قىركۇيەك ايىندا «التاي - تۇركى الەمىنىڭ التىن بەسىگى» حالىقارالىق فورۋم وتكىزىلەدى. شىعىس قازاقستاننىڭ بايىرعى تاريحى مەن ارحەولوگياسى الەمنىڭ وزىق عالىمدارىن تاڭعالدىرىپ، ءتانتى ەتۋدە»، - دەدى ايماق باسشىسى.
