سەربيا پرەزيدەنتى كوسوۆوداعى سەربتەردىڭ قاۋىپسىزدىگىن قامتاماسىز ەتۋگە شاقىردى
الەكساندر ۆۋچيچ ايتپەسە مۇنى ءوزى قولىمىزعا الامىز دەپ وتىر. ول كوسوۆو ۇكىمەتى تاراپىنان قۋدالاۋ توقتاتىلماسا، جەرگىلىكتى مەكەمەلەردە جۇمىس ىستەيتىن سەربتەر ەلدەن كەتىپ قالاتىنىن دا ەسكەرتتى.
14 جىل بۇرىن كوسوۆو ءبىر جاقتى تارتىپتە سەربيادان تاۋەلسىزدىگىن جاريالاعان ەدى. مۇندا تۇراتىن مىڭداعان سەرب جەرگىلىكتى مەكەمەلەرمەن بەرىلگەن قۇجاتتاردى مويىنداماي، سەربيالىق كۋالىكتەردى پايدالانىپ كەلگەن. جاقىندا كوسوۆو بيلىگى ءتيىستى قۇجاتتار كۇشىن جوياتىنىن مالىمەدەگەن. الايدا مۇنىڭ سوڭى نارازىلىق اكسيالارىن ۇلاسىپ كەتتى. وتكەن اپتادا ەۋرووداق وكىلدەرىنىڭ ىقپالداسۋىمەن تاراپتار اراسىندا كەلىسسوزدەر وتكەن. الايدا باسقوسۋ ەش ناتيجە بەرمەدى.
الەكساندر ۆۋچيچ، سەربيا پرەزيدەنتى:
- كوسوۆو اكىمشىلىگى تاراپىنان قۋدالاۋ توقتاتىلماسا، وندا جۇمىس ىستەيتىن ساياساتكەرلەر كەلەسى ايدا ەلدەن كەتىپ قالاتىنىن ەسكەرتتى. ارتىنشا سوت قىزمەتكەرلەرى مەن پوليتسەيلەر دە وسىلاي ىستەۋگە دايىن ەكەنىن ايتتى. سەربتەرگە ناتو كومەكتەسپەسە، ولاردى ءوزىمىز قورعايمىز. الداعى 10 كۇن ىشىندە تاراپتار ءبىر مامىلەگە كەلۋ جولدارىن ىزدەيدى. ءبىز بەيبىتشىلىكتى ساقتاپ قالۋعا بارىمىزدى سالامىز.
**
كوسوۆو رەسپۋبليكاسى - يۋگوسلاۆيا ىدىراۋىنىڭ سوڭعى وقيعاسىندا سەربيادان ءبولىنىپ شىققان ەل. بالقان تۇبەگىندەگى بار- جوعى 2 ميلليونعا جۋىق حالقى بار كوسوۆونىڭ «ءۇي ىشىنەن ءۇي تىگىپ»، ءوز تاۋەلسىزدىگىن جاريالاپ جىبەرۋى - الەمدىك قاۋىمداستىقتى ءارى- ءسارى كۇيگە ءتۇسىرىپ، بىتىسپەس ەكى- ءۇش جىككە ءبولىپ تاستادى. ا ق ش باستاعان باتىس ەلدەرى كىشكەنتاي كوسوۆونىڭ تىلەۋىن تىلەپ جاتسا، رەسەي مەن قىتاي سەكىلدى ەلدەردىڭ ۇيقىسى قاشتى. ءالىپتىڭ ارتىن باعىپ وتىرعان ەلدەر جانە بار. كوپتىڭ كوكەيىندە «كوسوۆو وقيعاسى بولاشاقتا الەمدى قايتا بولۋگە اكەپ سوقتىرىپ جۇرمەي مە؟» دەگەن ۇرەي باسىم. ويتكەنى كوسوۆونىڭ ار جاعىندا بۇكىل الەمدە 200-دەن استام تاۋەلسىزدىگى تانىلماعان ەلدەردىڭ تاعدىرى تالقىعا تۇسكەلى تۇر.
90-جىلدارعا دەيىن بالقان تۇبەگىن قىرىق قۇراۋ حالىقتان تۇراتىن يۋگوسلاۆيا مەملەكەتى تۇتاستاي الىپ جاتتى. 1991 -جىلى سيىردىڭ بۇيرەگىندەي بولشەكتەنىپ بارا جاتقان يۋگوسلاۆيادان سلوۆەنيا «ەنشىسىن» الىپ شىققاندا بەلگراد وعان تانكىمەن باسىپ كىرگەنىمەن، ەش قايران قىلا المادى. حورۆاتيا مەن بوسنيانىڭ ازاتتىعى جولىنداعى كۇرەستە 4 ميلليون ادام وپات بولدى. يۋگوسلاۆيانىڭ مۇراگەرى سەربتەر ەدى. دەموكراتياشىل باتىسقا اسىرەۇلتشىل سەربتەردىڭ وزگە ايماقتارعا باسقىنشىلىق ارەكەتتەرى ۇناعان ەمەس. انا ءبىر جىلدارى ناتو حاتشىسى حاۆەر سولانانىڭ بەلگرادتى بومبانىڭ استىنا الىپ، سەربتەردى ساباسىنا تۇسىرگەنى جۇرتشىلىقتىڭ ەسىندە.
1999 -جىلى ناتو- نىڭ بىتىمگەرشىلىك اسكەرىنىڭ كۇشىمەن كوسوۆو ايماعىنان سلوبودان ميلوشەۆيچتىڭ اسكەرى قۋىلدى. كوسوۆو سول جىلدان باستاپ ب ۇ ۇ قاۋىپسىزدىك كەڭەسىنىڭ 1244 قارارى بويىنشا ءبىر مەزەتتە سەربيانىڭ قۇرامىنداعى ولكە جانە ب ۇ ۇ باقىلاۋىنداعى ءوزىن- ءوزى باسقاراتىن اۆتونوميالىق پروۆينتسيا بولىپ سانالدى. الايدا الەمدە 193-مەملەكەت رەتىندە اتالعان دەنى مۇسىلمان كوسوۆو ەلىنىڭ تاۋەلسىزدىگى از ۇلتتاردى قان قاقساتقان يمپەريالار ءۇشىن قورقىنىش، ازاتتىققا تالپىنعان ۇلتتار ءۇشىن ۇلگى- ونەگە بولىپ تۇر. كوسوۆو — باتىستىق قۇندىلىقتارعا ارقا سۇيەيتىن بىردەن- ءبىر مۇسىلمان مەملەكەتى.
كوسوۆو 20 جىل بويعى ازاتتىق جولىنداعى كۇرەستە مۇراتىنا جەتتى. ارينە، ا ق ش جانە ەۋرووداقتىڭ قولداپ- قولپاشتاۋىمەن. وسى كەزگە دەيىن جۇرگىزىلگەن حالىقارالىق كەلىسىمدەردە سەربيا ەركىن اۆتونوميا، ال كوسوۆو تاۋەلسىزدىكتىڭ كەز كەلگەن فورماسى ءۇشىن جان الىسىپ، جان بەرىسىپ باقتى. الايدا تاۋەلسىزدىك 20 جىل بويى توگىلگەن قاننىڭ وتەۋى مە، الدە دۇنيە بولىسكە مۇددەلى الپاۋىتتاردىڭ «تارتۋى ما؟» ول جاعىن ناقتى باعامداۋ قيىن.
ب ۇ ۇ قاۋىپسىزدىك كەڭەسى كوسوۆو ماسەلەسىندە ورتاق كەلىسىمگە كەلە المادى. ب ۇ ۇ قاۋىپسىزدىك كەڭەسىنىڭ اشىق جيىنىندا كوسوۆو پرەمەر- ءمينيسترى حاشيم تاچي سەربيا مەن رەسەيدى تاۋەلسىزدىكتى تانۋعا شاقىردى. ونىڭ ايتۋىنشا، جالپى بالقان ايماعىنداعى ەلدەر اراسىندا تەرەڭ مۇددەلەستىك پەن تامىرلاستىق بار. «كوسوۆونىڭ بارلىق ازاماتتارىنىڭ قۇقى بىردەي، ەشقانداي كەمسىتۋشىلىككە جول بەرىلمەيدى. ءبىز بارلىق ۇلتتاردىڭ قۇقىن قورعايمىز»، - دەدى حاشيم تاچي. جىگەرلى حاشيم تاچي سوعىس جىلدارىندا اسا قاتاڭ دالا كومانديرلەرىنىڭ ءبىرى بولىپتى. سول ءۇشىن ساربازدار وعان «جىلان» دەگەن ايدار تاققان ەكەن.
حالىقارالىق ۇيىمداردىڭ ىشىنەن يسلام كونفەرەنسياسى ۇيىمى سۋىرىلىپ شىعىپ كوسوۆو تاۋەلسىزدىگىنە تىلەكتەستىگىن ءبىلدىردى. ءسوزسىز، بۇل ۇيىمنىڭ 57 مۇشەسىنىڭ اتىنان بولماسا دا، سولاردىڭ باسىم بولىگىنىڭ ۇستانىمىن كورسەتىپ بەرەدى. قازاقستان ءارقانداي ءبىر مەملەكەتتىڭ اۋماقتىق تۇتاستىعىنىڭ بۇزىلۋىن جانە ءبىرجاقتى تارتىپتە تاۋەلسىزدىك جاريالاۋدى قۇپتامايتىنىن جاريالادى. ت م د ەلدەرىنەن تاجىكستان مەن قىرعىزستان دا كوسوۆو تاۋەلسىزدىگىن مويىندامادى.
