تۇركىستاندا حالىقارالىق تالاپقا ساي سپورت كەشەندەرى سالىنىپ جاتىر

تۇركىستان. قازاقپارات - تۇركىستاندا حالىقارالىق تالاپقا ساي سپورت كەشەندەرىنىڭ قۇرىلىسى ءجۇرىپ جاتىر، دەپ حابارلايدى قازاقپارات ءتىلشىسى.

وليمپيادالىق رەزەرۆ مەكتەبىنىڭ اكىمشىلىك عيماراتى مەن جاتاقحاناسىنىڭ قۇرىلىسى اياقتالۋعا جاقىن. بەسقاباتتى جاتاقحانا اتالعان مەكتەپ شاكىرتتەرىن، ستۋدەنتتەر مەن قىزمەتكەرلەردى ۋاقىتشا باسپانامەن قامتاماسىز ەتۋ ماقساتىندا سالىنعان. 200 ورىندىق عيمارات قۇرىلىسى قازان ايىندا اياقتالادى. بۇگىندە ىشكى ارلەۋ جۇمىستارى جۇرگىزىلىپ، قۇرال-جابدىقتار ورناتىلا باستادى.

قالادا «مۇز سارايىنىڭ» قۇرىلىسى دا ءجۇرىپ جاتىر. الەمدىك ستاندارتتارعا ساي مۇزايدىنى 1200 ادامعا ەسەپتەلگەن. جاڭا نىسان جىل سوڭىندا اشىلادى.

سونداي-اق، «تەننيس ورتالىعى»، ب. ساتتارحانوۆ اتىنداعى سپورت كەشەنى، «ات سپورتى كەشەنى» سەكىلدى جاڭا نىساندار بوي كوتەردى. 35 گەكتار جەردە ورنالاسقان ات سپورتى كەشەنىندە پولو-كلۋب، مانەج، ستەندتىك اتىسقا ارنالعان الاڭقاي، ساداق اتۋعا ارنالعان الاڭ، كانال ارقىلى وتەتىن كوپىر مەن اتپەن سەرۋەندەۋ ايماعى بولادى.

وڭىردە فۋتبولعا ايرىقشا قولداۋ كورسەتىلىپ جاتىر. 20 گەكتار جەردە ورنالاسقان «TURAN» فۋتبول اكادەمياسىنىڭ قۇرىلىسى دا اياقتالۋعا تايادى. مۇندا سپورتشىلارعا ەۋروپانىڭ ۇزدىك كلۋبتارىنداعىداي جاعداي جاسالادى. جاڭا كەشەندە 10 فۋتبول الاڭى بولادى. دوپينگ-باقىلاۋ كابينەتتەرى، 300 ورىندى قوناق ءۇي دە بار.

ەلىمىزدە تەڭدەسى جوق ەسكەك ەسۋ كانالىنا دا سۋ كەلدى. وبلىس ورتالىعىنداعى سپورت كەشەنىنىڭ قۇرىلىسى حالىقارالىق تالاپتارعا ساي جۇرگىزىلىپ جاتىر. جالپى اۋدانى 100 گەكتارعا جۋىق الاڭدا ورنالاسقان كەشەندە ۇزىندىعى 2,5 شاقىرىمعا سوزىلاتىن سۋ ارناسى سالىندى. قۇرىلىستىڭ ەكىنشى كەزەڭى اياقتالعان سوڭ، مۇندا ساپبوردينگ، سۋ شاڭعىسى، فلايبوردينگ، ۆەيكسەرفينگ، كانوپولو، دراگونبوت جانە جاعاجاي فۋتبولى، ۆولەيبول، گاندبول، رەگبي سەكىلدى سۋ جانە جاعاجاي سپورتىنىڭ تانىمال تۇرلەرىنەن سايىستار وتەدى.

ەسكەك ەسۋ سپورتىن جان-جاقتى دامىتۋعا مۇمكىندىك جاسالادى. ازىرگە، بۇل سپورت تۇرىنەن تۇركىستان وبلىسى رەسپۋبليكادا كوش باستاپ تۇر.