قازاقستاننىڭ اسكەريلەرى حالىقارالىق ارميا ويىندارىنىڭ ءۇش سايىسىندا جەڭىمپاز اتاندى
جامبىل وبلىسىنداعى «گۆاردەيسك» پوليگونىندا ءوتىپ جاتقان مينااتقىش ەسەپتوپتاردىڭ جارىسىندا قازاقستاندىق ارتيللەريستەر ءۇشىنشى ەستافەتا كەزەڭىندە دە ۇزدىك دەپ تانىلدى. قازاقستان كومانداسى «ارتيللەريادان وق اتۋ شەبەرلەرى» بايقاۋىندا ەكىنشى جانە ءۇشىنشى ورىنداردى يەلەنگەن رەسەي مەن ازەربايجاننىڭ اسكەري قىزمەتشىلەرىن باسىپ وزدى.
اقمولا وبلىسىنداعى «اماندىق» پوليگونىندا اسكەري توپوگرافتاردىڭ «مەريديان» بايقاۋىندا قازاقستاندىق كوماندا جەڭىسكە جەتتى. «توپوگرافيالىق كۆادراتلون» دەپ اتالاتىن قورىتىندى كەزەڭدە قاتىسۋشىلار «لابيرينتتەن» ءوتىپ، كەدەرگىلەر جولاعىن ەڭسەردى، بولەك-بولەك توپوگرافيالىق كارتالاردان وبەكتىلەردىڭ كوورديناتتارىن انىقتادى.
توپوگەودەزيالىق ەسەپتوپ قۇرامىندا اعا لەيتەنانت ەرنات سۇلتانعازى، اعا لەيتەنانت نۇربەك رىسقوجايەۆ جانە كاپيتان نۇربولات جۇمابەكوۆ باعىت بويىنشا وتۋدەن ۇزدىك ناتيجە كورسەتىپ، ونىڭ ناتيجەسى قازاقستانعا بايقاۋدىڭ جالپى جەڭىسىن قامتاماسىز ەتتى. ەكىنشى ورىن قىتاي اسكەري قىزمەتشىلەرىنە، ءۇشىنشى ورىن بەلارۋس ەلىنە بۇيىردى.
«مەريديان» بايقاۋىندا مامانداردىڭ كۇردەلى گەودەزيالىق ەسەپتوپتاردىڭ ەپتىلىگىن، توپوگەودەزيالىق بولىمشەلەردىڭ شەبەرلىگى مەن ۇيلەسىمدىگى تەكسەرىلەدى. بۇنداي ساتتە ينتۋيتسيا جانە لوگيكالىق ويلاۋ قاسيەتتەرى دە ماڭىزدى. بيىل كوماندالاردىڭ دايىندىق دەڭگەيى جوعارى»، - دەپ اتاپ ءوتتى بايقاۋدىڭ باس تورەشىسى پولكوۆنيك شاياحمەت ءاشىروۆ.
قاراعاندى وبلىسىنداعى «سپاسسك» وقۋ-جاتتىعۋ ورتالىعىندا «تاكتيكالىق مەرگەن» بايقاۋىنا قاتىسۋشىلار قورىتىندى كەزەڭدە توپ قۇرامىندا ءىس-قيمىل جاساي وتىرىپ، وق اتۋ تاپسىرمالارىن ورىندادى. قاتىسۋشىلار ويلى-قىرلى جەرلەرمەن ءجۇرىپ ءوتىپ، عيماراتتاعى جانە شاتقالداعى نىسانالارعا وق جاۋدىردى.
«قاتىسۋشىلارعا قوسىمشا قيىندىق تۋدىرعان ەكسترەمالدى دەنە بەلسەندىلىگى مەن جىلدام قوزعالىس بولدى. سايىسۋشىلار ءدال اتۋ ءۇشىن كۇش-جىگەرى مەن بايىپتىلىعىن ساقتاپ، كوماندانىڭ تاكتيكالىق تۇرعىدان تەكسەرىلگەن ءىس-ارەكەتتەرى تۋرالى ۇمىتپاۋلارى قاجەت بولدى. سەبەبى، كوماندانىڭ ءبىر مۇشەسىنىڭ قاتەلىگى بۇكىل توپتىڭ ناتيجەسىنە اسەر ەتەدى»، - دەدى بايقاۋدىڭ تورەشىسى عالىم سادىقوۆ.
سوڭعى كەزەڭدە دە جانە «تاكتيكالىق مەرگەن» بايقاۋىنىڭ قورىتىندىسى بويىنشا دا قازاقستان جاۋىنگەرلەرى جەڭىسكە جەتتى. بايقاۋدا ەكىنشى ورىندى قىتاي كومانداسى يەلەنسە، ءۇشىنشى ورىندى رەسەي مەن وزبەكستاننىڭ اسكەري قىزمەتشىلەرى ءوزارا ءبولىستى.
