استانادا مۇگەدەك بالانى ۇرىپ-سوققان تاربيەشىنى قانداي جازا كۇتىپ تۇر

نۇر-سۇلتان. قازاقپارات - ەلورداداعى «ساتي» ينكليۋزيۆتى بالاباقشاسىندا قىزمەتكەرلەر مەن باسشىلىق تاراپىنان سابيگە دورەكى قىلىق كورسەتۋ فاكتىسى بويىنشا قىلمىستىق ءىستى تەرگەۋ جالعاسىپ جاتىر، دەپ حابارلايدى قازاقپارات ءتىلشىسى.

نۇر-سۇلتان قالاسىنىڭ پوليتسيا دەپارتامەنتىنەن حابارلاعانداي، سوتقا دەيىنگى تەرگەۋ ق ر قىلمىستىق كودەكسىنىڭ 140-بابى 2-بولىگى (كامەلەتكە تولماعان بالانى تاربيەلەۋ جونىندەگى مىندەتتەردى ورىنداماۋ) بويىنشا باستالدى.

وسى باپقا سايكەس، كىنالى 160 ا ە ك (508,8 مىڭ تەڭگە) دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىسىنا تارتۋعا، نە 160 ساعات قوعامدىق جۇمىس ىستەۋگە، نە 3 جىلعا دەيىنگى مەرزىمگە بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ايىرا وتىرىپ، 40 تاۋلىككە دەيىنگى مەرزىمگە قاماققا الۋعا جازالانادى.

«قازىرگى ۋاقىتتا قىلمىستىق ءىس بويىنشا سوتقا دەيىنگى قاجەتتى تەرگەۋ ارەكەتتەرى جۇرگىزىلىپ جاتىر، ونىڭ ناتيجەلەرى بويىنشا بالاباقشا تاربيەشىلەرىنىڭ، سونداي-اق باسشىسىنىڭ ارەكەتتەرىنە قۇقىقتىق باعا بەرىلەتىن بولادى. سوتقا دەيىنگى تەرگەۋ ناتيجەلەرى تۋرالى قىلمىستىق پروتسەسكە قاتىسۋشىلاردى تەرگەۋ جۇرگىزەتىن ورگان حاباردار ەتەدى»، - دەلىنگەن قازاقپارات ساۋالىنا بەرىلگەن جاۋاپتا.

ەسكە سالساق، بيىل ساۋىردە جەلىدە ەرەكشە ءبىلىم بەرۋ قاجەتتىلىكتەرى بار بالاعا جاسالعان ورەسكەل ارەكەت تۇسىرىلگەن ۆيدەو تاراعان ەدى. كەيىن تاربيەشىگە قاتىستى قىلمىستىق ءىس قوزعالعانى تۋرالى حابارلاندى.