قاتتى جەلدەن سەگىز ادام كوز جۇمدى
Meteo France ۇلتتىق مەتەورولوگيالىق اگەنتتىگىنىڭ حابارلاۋىنشا، داۋىل سالدارىنان كەيبىر اۋدانداردا جەلدىڭ ەكپىنى 220 ك م/ساعات بولدى.
فرانسۋز بيلىگىنىڭ مالىمەتىنشە، كورسيكا ارالىندا التى ادام كوز جۇمدى، ونداعان تۇرعىن جاراقات الىپ، 12 ادام اۋرۋحاناعا جاتقىزىلدى، ولاردىڭ بىرەۋى اۋىر حالدە. 45 مىڭعا جۋىق ءۇي ەلەكتر جارىعىنسىز قالعان.
سارسەنبى كۇنى پاريج مەترو ستانتسيالارى مەن مارسەلدىڭ ەسكى پورتىن سۋ باسقان. سەيسەنبىدە سۋ تاسقىنى كەزىندە ەيفەل مۇناراسىنىڭ جوعارعى جاعىندا 100 ك م/ساعات جىلدامدىقپەن جەل سوققان.
جەرورتا تەڭىزىنىڭ فرانتسۋز تەڭىز باسقارماسىنىڭ مالىمەتى بويىنشا، اپاتقا ۇشىراپ، سۋعا باتىپ كەتكەن 100 دەن استام قايىق شۇعىل كومەككە جۇگىنگەن.
يتاليانىڭ توسكانا جانە ۆەنەتو اۋداندارىندا توتەنشە جاعداي جاريالاندى.
بەيسەنبىدە داۋىلدان لۋككا مەن كاررارا قالالارىنىڭ ماڭىنداعى اعاشتار قۇلاعان كەزدە توسكانادا ەكى ادام كوز جۇمعان. كاررارا ماڭىنداعى شاتىرلى لاگەردە اعاشتاردىڭ قۇلاۋىنان تاعى ءتورت ادام جاراقات الدى.
ۆەنەتسيادا قاتتى جەل اۋليە ماركتىڭ قوڭىراۋ مۇناراسىنىڭ كىرپىش بولىكتەرىن جۇلىپ اكەتتى، تۋريستەر عيماراتتان ەۆاكۋاتسيالاندى.
يتاليانىڭ سولتۇستىگىندە داۋىل سالدارىنان گەنۋيا قالاسىنان وڭتۇستىك-شىعىسقا قاراي جۇرەتىن تەمىرجول جەلىسىن جابۋعا تۋرا كەلگەن. قاتتى جەل ەلەكتر تىزبەگىن زاقىمداعان.
