قازاقستاندا «ياندەكس تاكسي» جۇرگىزۋشىلەرىنە الەۋمەتتىك جارنا تولەنەدى

نۇر-سۇلتان. قازاقپارات - ەلىمىز «ياندەكس تاكسي» - ءدىڭ باسشىلىعىمەن جۇرگىزۋشىلەرگە الەۋمەتتىك جارنا تولەۋ جونىندە كەلىسىمگە كەلدى.

بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءمالىم ەتتى، دەپ حابارلايدى قازاقپارات ءتىلشىسى.

«ءبىز الەۋمەتتىك كودەكسكە فريلانسەرلەردىڭ ەڭبەك قۇقىعىن قورعاۋعا قاتىستى وزگەرىستەر ەنگىزدىك. الەۋمەتتىك كودەكسكە سايكەس ازاماتتار كۇنىنە 8, اپتاسىنا 40 ساعات جۇمىس ىستەۋى ءتيىس. بۇل جەردە اڭگىمە تولىققاندى جۇمىس ىستەيتىن ازاماتتارعا قاتىستى. ال ەندى فريلانس بولىپ نەمەسە نەگىزگى جۇمىسىنان كەيىن قوسىمشا ەڭبەكتەنەتىن جۇمىسشىلاردىڭ قۇقىعى ءالى كۇنگە دەيىن زاڭ ارقىلى رەتتەلمەگەن. مەن جاقىندا عانا ەلىمىزدەگى 8 ءىرى ونلاين پلاتفورمانىڭ باسشىلارىمەن كەزدەسۋ وتكىزدىم. سول كەزدە باسشىلاردان جۇمىسشىلار توتەنشە جانە جازاتايىم جاعدايعا ۇشىراپ قالسا، قانداي ساقتاندىرۋ قاراستىرىلعان دەگەندە، ەشقانداي ساقتاندىرۋ جوق دەگەن جاۋاپ الدىم»، - دەدى تامارا دۇيسەنوۆا «Qazaqstan» ۇلتتىق تەلەارناسىندا بولعان «جەدەل جەلى» باعدارلاماسىنىڭ ەفيرىندە.

مينيستر كەلتىرگەن مالىمەتكە سايكەس بۇگىندە ءتۇرلى ونلاين پلاتفورمالاردا 500 مىڭنان استام وتانداسىمىز جۇمىس ىستەپ جاتىر.

«كەشە عانا تسيفرلىق دامۋ ءمينيسترى باعدات مۋسينمەن بىرگە «ياندەكس تاكسي» - ءدىڭ باسشىلىعىمەن كەزدەستىك. سول كەزدەسۋدە تاكسي جۇرگىزۋشىلەرىنە الەۋمەتتىك جارنا تولەۋ جونىندە كەلىسىمگە كەلدىك»، - دەيدى ۆەدومستۆو باسشىسى.