شىعىس قازاقستاندا تۇرمەگە درون ارقىلى ەسىرتكى كىرگىزىلمەك بولعان - فوتو
ش ق و بويىنشا قىلمىستىق اتقارۋ جۇيەسى دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، و ۆ 156/20 تۇزەتۋ مەكەمەسىنىڭ قىزمەتكەرلەرى سمارتفوندار جانە سكوتچپەن ورالعان تۇيىنشەك سالىنعان دروندى تاپقان.
درون كولونيا ماڭىنداعى بوس تۇرعان ەسكى عيماراتتىڭ ىشىنەن تابىلدى. بەلگىلى بولعانداي، كىم ەكەندەرى ءالى انىقتالماعان ءتارتىپ بۇزۋشىلار وسى عيماراتقا تىعىلىپ، تۇرمە اۋماعىنا دروننىڭ كومەگىمەن تىيىم سالىنعان زاتتاردى تاستاۋعا دايىندالعان. الايدا قىزمەتكەرلەردى بايقاعان ولار ءوز اپپاراتتارىن الۋعا ۇلگەرمەي قاشىپ كەتتى.
«اتالعان فاكتى بويىنشا وسكەمەن قالالىق پوليتسيا باسقارماسىنىڭ جەدەل-تەرگەۋ توبى شاقىرىلدى. تۇيىنشەكتى اشۋ كەزىندە ەسىرتكىگە ۇقساس زات شىقتى. سونداي-اق ەكى سمارتفون جانە باسقارۋ پۋلتى بار درون تابىلدى. قازىرگى ۋاقىتتا ءتيىستى ساراپتاما تاعايىندالعان»، - دەيدى دەپارتامەنتتىڭ رەسمي وكىلى سالتانات وجيكانوۆا.
