الماتى پوليتسەيلەرى قالا تۇرعىندارىن تەلەفونداعى كۇماندى سىلتەمەلەرگە وتپەۋگە شاقىردى
ايتۋىنشا، بۇل ۆيرۋستىق فايلدار مەن قوسىمشالار بولۋى مۇمكىن، ولار الاياقتاردىڭ موبيلدى بانكينگتەگى قاراجاتىڭىزعا قول جەتكىزۋىنە مۇمكىندىك بەرەدى.
«ءارتۇرلى سايتتارعا ءوزىڭىزدىڭ بانك كارتالارىڭىزدىڭ دەرەكتەرىن ەنگىزبەڭىز، سەبەبى بۇل ءسىزدىڭ جەكە اقپاراتىڭىزدى جيناۋ ءۇشىن ارنايى قۇرىلعان، ءارى قاراي ءسىزدىڭ بانك كارتاڭىزدان رۇقساتسىز تولەم جاساۋ ءۇشىن پايدالانىلاتىن «فيشينگتىك» سايتتار بولۋى مۇمكىن»، - دەيدى قۋاتبەك ناۋاتوۆ.
سونىمەن قاتار، ول اقشانى كوبەيتۋگە ۋادە بەرەتىن نەمەسە ۇلكەن اقشالاي ۇتىستار تۋرالى حابارلايتىن ينتەرنەتتەگى كۇماندى بايقاۋلارعا قاتىسپاۋعا كەڭەس بەردى.
«ازاماتتارعا كريپتوۆاليۋتالارعا، اكسيالارعا، باعالى مەتالدارعا جانە تاعى باسقالارعا ينۆەستيتسيالاۋ ارقىلى ۇلكەن ديۆيدەندتەر بەرەتىن كۇماندى جوبالارعا اقشا سالماڭىزدار. سونىمەن قاتار، الاياقتار ءارتۇرلى ەلدەردەن جوق ابونەنتتىك نومىرلەردەن قوڭىراۋ شالىپ، ولاردىڭ فيرمالارىنا (QuestraWorld, AssetWorldManagement) ينۆەستيتسيالاۋدىڭ پايداسى تۋرالى نانىمدى تۇردە ايتۋى مۇمكىن»، - دەدى ول.
اۆتور
الما مۇقانوۆا
