قالاداعى ۇيلەرگە گاز تارتۋ قارقىنى ەكى ەسە ارتتى - ەلوردا اكىمى

نۇر- سۇلتان. قازاقپارات - ەكى جىلدا ەلوردا اۋماعىنداعى ۇيلەرگە گاز تارتۋ جۇمىستارى قارقىندى جۇرگىزىلەدى. بۇل تۋرالى قالا اكىمى التاي كولگىنوۆ ايتتى، دەپ حابارلايدى قازاقپارات.

«ەلورداداعى تۇرعىن ۇيلەرگە گاز تارتۋ قالانىڭ ەكولوگياسىنا وڭ اسەرىن تيگىزەتىنى تۇسىنىكتى. بۇل ماسەلە پرەزيدەنتتىڭ باقىلاۋىندا تۇر، ءتيىستى قاراجات ءبولىندى. الماتى، سارى ارقا اۋداندارىنا گاز جەلىلەرى تارتىلدى، قازىر ۇيلەردى گازعا قوسۋ ءجۇرىپ جاتىر. قۇجات تاپسىرۋ ءراسىمى جەڭىلدەتىلىپ، گازعا قوسىلۋ قارقىنى ەكى ەسە ارتتى. ماۋسىم ايىندا سارىارقا اۋدانىندا 140 ءۇي گازعا قوسىلسا، شىلدەدە 290 ۇيگە گاز تارتىلدى. قىس باستالعانشا ءبىراز ءۇيدى گازعا قوسىپ ۇلگەرەمىز»، - دەدى ا. كولگىنوۆ ەلوردا ءماسليحاتىنىڭ كەزەكتەن تىس سەسسياسىندا.

ونىڭ ايتۋىنشا، سارىارقا اۋدانىندا 2,5 مىڭ تۇرعىن ءۇي گازعا قوسىلعان.

«الماتى اۋدانىندا دا جۇمىستار وسى تارتىپتە ءجۇرىپ جاتىر. وسى اۋماقتا ءتۇتىن ەداۋىر ازايعان. گازدىڭ تارتىلۋىنا وراي ەكولوگيامىز جاقسارىپ كەلەدى. الداعى جىلدان باستاپ «شۇبار» شاعىن اۋدانىنا گاز تارتامىز. اتاپ ايتقاندا، ەكى جىلدىڭ ىشىندە گاز تارتۋ جۇمىستارىن قارقىندى جۇرگىزسەك، قالامىزدىڭ ەكولوگياسى الدەقايدا جاقسارادى»، - دەدى اكىم.

بۇدان بۇرىن حابارلانعانداي، بۇگىن ەلوردا ءماسليحاتىنىڭ كەزەكتەن تىس سەسسياسىندا بيۋدجەتتى ناقتىلاۋ ماسەلەسى قارالدى.

رەداكتور

اسحات رايقۇل