قىرىم اۋەجايىنداعى جارىلىستىڭ سەبەبى بەلگىسىز

نۇر- سۇلتان. قازاقپارات – ۋكرايناداعى سوعىستىڭ باستالعانىنا جارتى جىلعا جۋىقتادى. ءبىراق قاقتىعىستىڭ ازىرگە بىتەر ءتۇرى كورىنبەيدى. قازىرگى تاڭدا تاراپتار ءىشىنارا شابۋىلعا شىققانىمەن، ايتارلىقتاي وزگەرىس جوق. سوڭعى بىرنەشە كۇندە بۇقارالىق اقپارات قۇرالدارىندا قىرىمداعى ساق اۋەجايىنداعى جارىلىس قىزۋ تالقىلانىپ جاتىر.

ازىرگە جارىلىسقا ناقتى نە سەبەپ بولعانى بەلگىسىز. ەستەرىڭىزگە سالساق، 9- تامىز كۇنى ءتۇس اۋا قىرىمنىڭ ساق اۋدانىنداعى نوۆوفەدوروۆكا اۋىلىندا جارىلىس بولىپ، سالدارىنان ءبىر ادام قازا تاۋىپ، تاعى بىرنەشە ادام جارالاندى. Reuters اگەنتتىگىنىڭ حابارلاۋىنشا، تۇرعىندار 15:20 شاماسىندا كەم دەگەندە 12 جارىلىس ەستىگەنىن جەتكىزگەن.

قىرىمداعى نوۆوفەدوروۆكادان ۋكراينا قارۋلى كۇشتەرىنىڭ حەرسون وبلىسىنداعى پوزيتسيالارىنا دەيىنگى ارالىق 200 شاقىرىمنان اسادى. اتالعان ەلدە مۇنداي قاشىقتىققا ۇشاتىن زىمىرانداردىڭ بار- جوعى تۋرالى رەسمي مالىمەت جوق. سوندىقتان اۋەجايداعى جارىلىستىڭ قالاي وربىگەنى اسكەري ساراپشىلار ءۇشىن دە تۇسىنىكسىز بولىپ تۇر.

جالپى، قىرىم تۇبەگىندە كەڭەس وكىمەتى كەزىندە- اق كوپتەگەن اسكەري نىسان سالىنعان. سوندىقتان ونى قورعاۋعا، اسىرەسە اۋە شابۋىلدارىنا تويتارىس بەرۋگە مۇمكىندىك مول. ساق اۋدانىنداعى اۋەجاي دا وسىنداي ستراتەگيالىق ماڭىزدى نىساننىڭ ءبىرى.

2014 -جىلدان باستاپ ايەرودرومدا قارا تەڭىز فلوتىنىڭ اسكەري- تەڭىز اۆياتسياسىنىڭ 43- اسكەري- شابۋىلداۋشى اۆياتسيالىق پولكى ورنالاسقان. سپۋتنيكتەن تۇسىرىلگەن سۋرەتتەرگە كوز جۇگىرتسەك، اۋەجايدا س ۋ-24م بومبالاۋشى، س ۋ-30 جويعىش جانە باسقا دا ۇشاقتار تۇرعانىن اڭعاراسىز.

ال امەريكالىق Planet Labs كومپانياسىنىڭ 10- تامىزدا تۇسىرگەن سۋرەتتەرىندە ورتەنگەن جەر مەن قيراعان تەحنيكا انىق بايقالادى. BBC ارناسىنىڭ حابارلاۋىنشا، اۋەجايدىڭ ۇشۋ- قونۋ جولاعى بۇزىلماعان. الايدا كەمىندە سەگىز ۇشاق قيراعان نەمەسە قاتتى زاقىمدانعان.

رەسەي قورعانىس مينيسترلىگى وقيعاعا بايلانىستى مالىمدەمە جاساپ، وق- ءدارى قويماسى جارىلعانىن حابارلادى. ءبىراق ۇشاقتاردىڭ قيراعانى جونىندە ءتىس جارعان جوق. سونداي- اق اتالعان ەلدىڭ بۇقارالىق اقپارات قۇرالدارى بازاعا شابۋىل جاسالماعانىن جازدى.

ۋكراينا تاراپى دا سوققى جاساعانى تۋرالى مالىمەت تاراتقان جوق. دەگەنمەن ەل پرەزيدەنتى ۆولوديمير زەلەنسكي ءوز ۇندەۋىندە «قىرىمنان باستالعان سوعىس قىرىمدى ازات ەتۋمەن اياقتالۋعا ءتيىس» دەپ ايتتى.

ۋكراينا پرەزيدەنتى كەڭسەسى باسشىسىنىڭ كەڭەسشىسى ميحايل پودولياك ايەرودرومداعى جارىلىسقا ۋكراينانىڭ قاتىسى جوق ەكەنىن العا تارتىپ، وقيعانى قىرىمداعى پارتيزانداردىڭ ءىسى بولۋى مۇمكىن دەگەن بولجام جاسادى. Washington Post گازەتى دە وسىنداي ىڭعايداعى اقپارات تاراتتى. باسىلىم جارىلىستى ۋكراينا ارنايى وپەراتسيا كۇشتەرىنىڭ ارەكەتى دەپ جازدى.

ايتسە دە، ساراپشىلار ايتىلعان نۇسقالاردىڭ ەشقايسىسى سەنىمدى ەمەس ەكەنىن العا تارتادى. ءبىراق جارىلىسقا ناقتى نە سەبەپ بولعانىن ەشكىم ءدوپ باسىپ ايتا الماي وتىر.

«ەگەمەن قازاقستان»