ەلوردا بالاباقشاسىنداعى بالا ءولىمى: ءسابي دەنەسىنەن جاراقات انىقتالدى
ءبۇلدىرشىن ۇيدەگى جەكە باقشادا بولعان. تولىعىراق اقپاراتتى پوليتسيا دەپارتامەنتى جاريالاماي وتىر، دەپ حابارلايدى قازاقپارات ءتىلشىسى.
بۇعان دەيىن بۇقارالىق اقپارات قۇرالدارىندا ءبۇلدىرشىن قىزدىڭ سۋعا ءتۇسۋ كەزىندە باتىپ كەتكەنى، دەنەسىنەن كوپتەگەن جاراقات تابىلعانى حابارلانعان بولاتىن. پوليتسيا دا بۇل فاكتىلەردى راستاپ وتىر.
ەلوردالىق پوليتسيا دەپارتامەنتىنىڭ مالىمەتىنشە، وسى جىلدىڭ ساۋىرىندە «102» ارناسىنا تاحا حۋسەين كوشەسىندەگى پاتەردەن دەنە جاراقاتتارى كورىنەتىن 2020 -جىلى تۋعان جاس قىزدىڭ ءمايىتى تابىلعانى تۋرالى حابارلاما تۇسكەن. اتالعان فاكتى بايقوڭىر اۋداندىق پوليتسيا باسقارماسىندا سوتقا دەيىنگى تەرگەپ- تەكسەرۋدىڭ ءبىرىڭعاي تىزىلىمىنە ق ر قىلمىستىق كودەكسىنىڭ 141-بابى 2-تارماعىمەن تىركەلگەن.
«قازىرگى ۋاقىتتا بارلىق قاجەتتى تەرگەۋ ارەكەتتەرى جۇرگىزىلۋدە جانە ءبىرقاتار ساراپتاما تاعايىندالدى. ونىڭ قورىتىندىسى بويىنشا پروتسەسسۋالدىق شەشىم قابىلدانادى. قر قىلمىستىق- پروتسەستىك كودەكسىنىڭ 201-بابىنا سايكەس، سوتقا دەيىنگى تەرگەپ- تەكسەرۋ دەرەكتەرى پروكۋروردىڭ رۇقساتىنسىز جاريا ەتىلۋگە جاتپايدى»، - دەدى پوليتسەيلەر قازاقپارات ءتىلشىسىنىڭ ساۋالىنا بەرگەن جاۋابىندا.
ەكى جاسار ءسابيدىڭ ولىمىنە بالاباقشا كۇتۋشىسى كۇدىكتى دەپ تانىلعان. پوليتسيا بۇل جايتقا قاتىستى دا ەگجەي- تەگجەيلى مالىمەت بەرمەدى.
اۆتور
مارلان جيەمباي
