قازاقستاندا قايىرىمدىلىق جاساعان ادامدارعا اتاق بەرىلەدى
بۇل تۋرالى ق ر اقپارات جانە قوعامدىق دامۋ مينيسترلىگى ازاماتتىق قوعام ىستەرى كوميتەتىنىڭ ءتوراعاسى ماديار قوجاحمەت ءمالىم ەتتى، دەپ حابارلايدى قازاقپارات ءتىلشىسى.
«قايىرىمدى ءىس جاساعان ادامعا نەمەسە ۇيىمعا قۇرمەتتى اتاق بەرىلەدى. قازىر ونىڭ ەرەجەسى مەن تالابى ازىرلەنىپ جاتىر. قايىرىمدىلىق جاساعانى ءۇشىن بەرىلەتىن قۇرمەتتى اتاق جىل سايىن بايقاۋ نەگىزىندە تاعايىندالادى. اتاق جەكە ادامعا نەمەسە ۇيىمعا بەرىلۋى مۇمكىن. كىسىنىڭ نەمەسە ۇيىمنىڭ جاساعان يگى ىستەرىن ارنايى كوميسسيا قاراپ، ناتيجەسىندە قۇرمەتتى اتاق بەرۋ نەمەسە بەرمەۋ تۋرالى شەشىم قابىلدانادى»، - دەدى ماديار قوجاحمەت ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
كوميتەت باسشىسىنىڭ ايتۋىنشا، قايىرىمدى جاندارعا بەرىلەتىن قۇرمەتتى اتاق مەملەكەت تاراپىنان كورسەتىلگەن العىستىڭ بەلگىسى.
ايتا كەتسەك، بۇگىن ورتالىق كوممۋنيكاتسيالار قىزمەتى الاڭىندا قر اقپارات جانە قوعامدىق دامۋ مينيسترلىگى ازىرلەگەن «كەيبىر زاڭنامالىق اكتىلەرىنە ۆولونتەرلىك قىزمەت، قايىرىمدىلىق، مەملەكەتتىك الەۋمەتتىك تاپسىرىس، ستراتەگيالىق ارىپتەستىكتى ىسكە اسىرۋعا مەملەكەتتىك تاپسىرىس، ۇكىمەتتىك ەمەس ۇيىمدارعا ارنالعان گرانتتار مەن سىيلىقتار، دارىلىك جانە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ورتاعا سالىندى.
مينيسترلىك وكىلىنىڭ مالىمەتىنشە، اتالعان زاڭ جوباسىن ازىرلەۋدە جان- جاقتى تالقىلاۋلار جۇرگىزىلىپ، جۇرتشىلىقتىڭ ۇسىنىستارى ەسكەرىلدى.
زاڭ جوباسى ءۇش نەگىزگى بلوكتان تۇرادى: ۆولونتەرلىك قىزمەت، قايىرىمدىلىق جانە ۇكىمەتتىك ەمەس ۇيىمداردى مەملەكەتتىك قولداۋ.
بۇعان دەيىن قايىرىمدىلىق ماقساتىندا حالىقتان جىلۋ جينايتىن بلوگەرلەر ەندى كومەككە مۇقتاج كىسىمەن نەمەسە ۇيىممەن كەلىسىمشارت جاساسۋعا مىندەتتى ەكەنى تۋرالى حابارلاعان ەدىك.