بىشكەكتە قازاق كينوسىنىڭ كۇندەرى ءوتتى

بىشكەك. قازاقپارات - بىشكەكتە قازاق كينوسىنىڭ كۇندەرى ءوتتى. كورەرمەنگە بولات قالىمبەتوۆتىڭ «مۇقاعالي» جانە ايجان قاسىمبەكتىڭ «وت» فيلمدەرى ۇسىنىلدى، دەپ حابارلايدى قازاقپارات.

«قازاقستاندىق فيلمدەردى ءبىزدىڭ ەلدە كورسەتۋگە ءارقاشان دايىنبىز. سىزدەردىڭ فيلمدەرىڭىز ابىرويلى حالىقارالىق كينوفەستيۆالدەردە جەڭىسكە جەتكەندە دە شىنايى قۋانامىز. ءبىز سەرىكتەستىككە اشىقپىز جانە جاقىن ارادا قازاقستاندا قىرعىز كينوسىنىڭ كۇندەرىن وتكىزۋدى جوسپارلاپ وتىرمىز»، - دەيدى ت. وكەيەۆ اتىنداعى «قىرعىز فيلم» ۇلتتىق كينوستۋدياسىنىڭ ديرەكتورى اقجول بەكبولوتوۆ.

قازاق كينوسىنىڭ كۇندەرى اياسىندا ۇلتتىق كينونى قولداۋ مەملەكەتتىك ورتالىعى حالىقارالىق ءبولىمىنىڭ باسشىسى اسەل ىرىس، رەجيسسەر بولات قالىمبەتوۆ، پروديۋسەر ديانا اشيموۆا، اكتەر تولەپبەرگەن بايساقالوۆ جانە تاعى باسقا دا دەلەگاتسيا مۇشەلەرى ش. ايتماتوۆ اتىنداعى كينو ۇيىندە بولدى. وندا ورتالىق قىزمەتى تانىستىرىلىپ، سوڭىنان دوڭگەلەك ۇستەل ءوتتى.

ال، كەشكە كورەرمەن قازاق اقىنى مۇقاعالي ماقاتايەۆتىڭ ءومىرىنىڭ سوڭعى جىلدارىن كورسەتەتىن «مۇقاعالي» فيلمىن تاماشالادى.

ەسكە سالا كەتەيىك، بۇل فيلم 25- «قاراڭعى تۇندەر» تاللين كينوفەستيۆالى ەكونوميكالىق قازىلار القاسىنىڭ سىيلىعىنا يە بولعان.

«سوڭعى جىلدارى ورتالىق ازيالىق كينو جايلى اقپاراتتىڭ ازدىعى سەزىلەدى. ءبىراق ءبىز، قىرعىز كينەماتوگرافيستەرى وزبەك، تاجىك، تۇرىكمەن جانە قازاق كينوسىن تاماشالاپ، ارىپتەستەرىمىزدىڭ جاڭالىقتارىن ءبىلىپ، بىرلەسكەن جوبالاردى ويلاستىرۋىمىز كەرەك. بۇل كورەرمەندەر ءۇشىن دە ماڭىزدى»، - دەيدى قىرعىز رەجيسسەرى ارتىك سۋيۋندۋكوۆ.

6- تامىزدا قازاقستاندىق دەلەگاتسيا قىرعىز ارىپتەستەرىمەن بىرگە قىرعىزستاننىڭ ۇلتتىق تاريحي مۇراجايىندا بولدى. سول كۇنى كەشكە كينو كۇندەرىنىڭ جابىلۋ سالتاناتى ءوتىپ، ايجان قاسىمبەكتىڭ «وت» فيلمى كورسەتىلدى. كينوسۇيەر قاۋىم كارتينانى جىلى قابىلدادى جانە فيلمدە باياندالاتىن وقيعا بارشاعا ورتاق ەكەنىن اتاپ ءوتتى.

«فيلم شىنايى ءومىر، قاراپايىم ادامنىڭ قيىن تاعدىرى تۋرالى. وقيعا ءبىزدىڭ حالىقتارىمىزعا جاقىن. ەشتەڭەگە قاراماستان ءومىر ءسۇرۋدى، جاقسى كورۋدى جالعاستىرۋ كەرەكتىگىن باياندايدى»، - دەيدى باستى ءرولدى سومداعان تولەپبەرگەن بايساقالوۆ.

ايتا كەتسەك، بىشكەكتە 5-6- تامىزدا وتكەن قازاق كينوسى كۇندەرىن ەلىمىزدىڭ ۇلتتىق كينونى قولداۋ مەملەكەتتىك ورتالىعى جانە قىرعىزستاننىڭ مادەنيەت، اقپارات، سپورت جانە جاستار ساياساتى مينيسترلىگى كينەماتوگرافيا دەپارتامەنتى ۇيىمداستىرادى.