بيىل مەكتەپ فورماسى وزگەرە مە، بالالار بۇرىن العان فورماسىمەن ساباققا بارا الاما
وتكەن جىلداعىداي زاڭنامالىق نورمالار قولدانىلادى. ياعني وقۋشىلار بۇرىن ساتىپ العان نەمەسە دايىنداعان فورمامەن مەكتەپكە ەركىن كەلە الادى، دەپ حابارلايدى قازاقپارات.
سونىمەن بىرگە اتا- انالاردان كەيبىر مەكتەپتەردە مەكتەپ فورماسىنا قويىلاتىن تالاپتار، ياعني ءتۇس، كيىم ديزاينى بويىنشا تالاپتار ناقتى جەتكىزۋشىلەرگە نەمەسە وندىرۋشىلەرگە سايكەس جاسالعانى تۋرالى شاعىمدار بار.
وسىعان بايلانىستى كەيبىر وڭىرلەردە ءبىلىم باسقارمالارى اتا- انالار قاۋىمداستىعى جانە قامقورشىلىق كەڭەستەرىمەن كەلىسە وتىرىپ، ءار مەكتەپ ءوز تالاپتارىن قويماۋى ءۇشىن وڭىردە ءبىرىڭعاي ءتۇستى ەنگىزۋدى، سول ارقىلى اتا- انالاردىڭ تاڭداۋىنا شەكتەۋ قويۋ جونىندە شەشىم قابىلدادى.
«بۇل رەتتە اتا- انالاردىڭ نازارىن تالاپتاردىڭ ءوزى وزگەرمەگەنىنە اۋدارعىمىز كەلەدى. مىسالى، ەگەر وقۋشى مەكتەپكە ساتىپ الىنعان نەمەسە بۇرىن سول مەكتەپتىڭ قامقورشىلىق كەڭەسى بەكىتكەن اعا- اپكەلەرىنەن قالعان فورمانى كيىپ كەلە الادى. اتا- انالاردىڭ وتىنىشتەرىنەن كەيىن بىرنەشە ءبىلىم باسقارماسى قامقورشىلىق كەڭەستەرمەن بىرلەسىپ، وبلىس بويىنشا مەكتەپ فورماسىنىڭ بىركەلكى ءتۇسىن بەلگىلەۋگە شەشىم قابىلدادى. بارلىعى قويۋ كوك ءتۇستى تاڭدادى. ءبىراق بۇل بالالاردى شەكتەمەيدى، ياعني ولار بۇرىننان بار مەكتەپ فورماسىمەن كەلە الادى. وبلىس بويىنشا مەكتەپ فورماسىنىڭ ءبىرىڭعاي ءتۇسىن بەلگىلەۋگە توقتالا كەتسەك. بۇل ناقتى جەتكىزۋشىلەرگە تالاپ قويۋ تاۋەكەلدەرىن بارىنشا ازايتىپ، قولجەتىمدى فورمانى (نارىقتا نەمەسە دۇكەندە) ساتىپ الۋعا مۇمكىندىك بەرەدى. سونداي- اق وقۋ جىلىنا دەيىن اتاۋلى الەۋمەتتىك كومەك الاتىن نەمەسە جان باسىنا شاققانداعى ورتاشا تابىسى ەڭ تومەنگى كۇنكورىس دەڭگەيىنەن تومەن، جەتىم جانە اتا- اناسىنىڭ قامقورلىعىنسىز قالعان، توتەنشە جاعدايعا تاپ بولعان وتباسىلاردان شىققان 418 مىڭ بالاعا كومەك كورسەتىلەتىنىن اتاپ وتەمىن. ولارعا مەكتەپ فورماسى مەن كەڭسە تاۋارلارىن ساتىپ الۋ ءۇشىن «جالپىعا مىندەتتى ءبىلىم بەرۋ» قورىنان قولداۋ كورسەتىلەدى» ، - دەدى مەكتەپكە دەيىنگى جانە ورتا ءبىلىم كوميتەتىنىڭ ءتوراعاسى گۇلميرا كارىموۆا.
