حاگي-ۆاگي جانە كيسي-ميسي بالانىڭ جۇيكە جۇيەسىن بۇزادى - پسيحولوگ

نۇر-سۇلتان. قازاقپارات - پسيحولوگتار ترەندكە اينالعان حاگي-ۆاگي مەن كيسي-ميسي سەكىلدى قورقىنىشتى قۋىرشاقتارمەن ويناۋ وتە قاۋىپتى ەكەنىن ايتادى، - دەپ حابارلايدى «ك ت ك» تەلەارناسى.

تەلەارنا مالىمەتىنشە، دۇكەندەردە ءتۇر-ءتۇسى ۇسقىنسىز تاۋارلارعا سۇرانىس ارتقان. الايدا ماماندار اتا- انالارعا مۇنداي ادامشوشىرلىق بەينەدەگى ويىنشىقتاردى بالانىڭ لوگيكاسىن كەڭەيتىپ، قىزىعۋشىلىعىن وياتاتىن دۇنيەلەرگە الماستىرۋعا كەڭەس بەرەدى. حاگي-ۆاگي مەن كيسي-ميسي ويىنشىقتارىن قازىر ەلىمىزدەگى كەز كەلگەن دۇكەننەن تابۋعا بولادى. ءتىپتى كەيىنگى جارتى جىلدا بۇلار ەڭ ءوتىمدى تاۋارعا اينالعان. ساتىلىمدا ويىنشىقتىڭ ءتۇرلى ولشەمى مەن ءتۇسى بار. ساتۋشىلار بۇل ويىنشىقتاردى كىشكەنتايلاردىڭ ارنايى ىزدەپ كەلەتىنىن ايتادى.

«دۇكەنىمىزگە كىرگەن بالالاردىڭ تاڭداۋى ەڭ الدىمەن وسى - حاگي-ۆاگي مەن كيسي-ميسي. اتا- انالار ونى اپەرمەۋگە تىرىسقانىمەن، كىشكەنتايلارى قاسارىسىپ تۇرىپ الادى. كەيدە ءتىپتى جانىندا ەرىپ كەلگەن اتا- اجەلەردىڭ ءوزى ءتۇرىن كورىپ شوشىپ جاتاتىن جاعدايلار دا بولادى. ءبىراق ۇل- قىزدارى اقىرى ايتقانىن الماي قايتپايدى. كۇنىنە شامامەن حاگي-ۆاگي مەن كيسي- ءميسيدىڭ 20-دان اسا داناسى ساتىلادى»، - دەيدى ساتۋشى ۇلان اشىقبايەۆ.

اتا-انا ءسانيا يساتايەۆا دا قازىر كىشكەنتايلارىن ويىنشىق دۇكەنىنە اپارۋدى قويعان. ويتكەنى ءۇش ۇلى دا تەك حاگي-ۆاگي مەن كيسي-ميسي-دىڭ جانكۇيەرلەرى. ساۋدا ورىندارىنان بەينەسىن كورسە، كەنەدەي جابىسا قالادى ەكەن. ويتكەنى بالاباقشادان كۇندە كورىپ، وزگە بالالارمەن وينايتىنى دا وسى ويىنشىق ەكەن. بىرەۋىنىڭ ءوزىن 8-10 مىڭ تەڭگەگە ساتىپ العان.

«جارتى جىل بۇرىن وسى حاگي-ۆاگي، كيسي-ميسي دەگەن ويىنشىقتار شىققان ەدى. بالام سول كەزدە باسقا بالالاردان كورىپ، جىلاپ الدىرتقان بولاتىن. ەندى بالام جىلاعان سوڭ الىپ بەردىم. ءتۇرى شىنىمەن دە، ەشبىر جانۋارعا ۇقسامايتىن قىزىق ويىنشىق»، - دەيدى الماتى تۇرعىنى ءسانيا يساتايەۆا.

حاگي ۆاگي - Poppy Playtime 16+ ويىنىنىڭ كەيىپكەرى، وندا ءتىرى قالۋ ءۇشىن كۇرەسەتىن قورقىنىشتى سيۋجەت كورسەتىلەدى. ويىنشىق ەرەكشە كورىنىسكە يە، ءبىر قاراعاندا قىزىق ءارى كۇلكىلى كورىنەدى.

«مۇنداي قورقىنىشتى ويىنشىقتار بالانىڭ پسيحيكاسىنا كەرى اسەر ەتەدى. ويتكەنى بالانىڭ جالپى پسيحيكاسى قالىپتاسپاعاندىقتان، جاقسى- جامان، شىنايى- وتىرىك الەمدى تولىق اجىراتا الماي ءارى ولارمەن كوپ ۋاقىت وتكىزگەندىكتەن مىندەتتى تۇردە ونداي نارسەدەن اسەر الادى»، - دەپ ءتۇسىندىردى پسيحولوگ ەرجان مىرزابايەۆ.

سونداي- اق، ماماندار كەيبىر بالالار بۇل ويىنشىقتى ءوزىنىڭ قورقىنىشىن باسۋ ءۇشىن ساتىپ الاتىنىن ايتادى. ەڭ الدىمەن، پسيحولوگتار بالانىڭ ۇيدە قانداي مۋلتفيلم كورەتىنىنە باسا نازار اۋدارۋ كەرەگىن، سونىمەن قاتار، كوڭىل كۇيدى كوتەرىپ، دامۋىنا پايداسى تيەتىن ويىنشىقتاردى عانا اپەرگەن ابزال ەكەنىن جەتكىزدى.

اقپارات دەرەككوزى: massaget.kz