قازاقستاندا اۋە رەيسى كەشىككەندە سالىناتىن ايىپپۇلدىڭ كولەمى ارتۋى مۇمكىن
بۇل جايىندا ازاماتتىق اۆياتسيا كوميتەتىنەن ءمالىم ەتتى، دەپ حابارلايدى قازاقپارات ءتىلشىسى.
«قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ ءمينيسترى ق. وسكەنبايەۆتىڭ تاپسىرماسىمەن ازاماتتىق اۆياتسيا كوميتەتى رەيستەردىڭ كەشىگۋىنە بايلانىستى تەرگەۋ جۇمىسىن جالعاستىرىپ جاتىر. اتاپ ايتقاندا، تەرگەۋ باستالعاننان بەرى «ەير استانا» اۋە كومپانياسى توبىنا قاتىستى اكىمشىلىك قۇقىق بۇزۋ تۋرالى كودەكستىڭ 567-بابى 2-تارماعى بويىنشا رەيستەردىڭ كەشىگۋىنە بايلانىستى جولاۋشىلار قۇقىعىنىڭ بۇزىلۋىنا وراي ءارقايسىسى ءبىر مىڭ ا ە ك- ءتى قۇرايتىن 4 حاتتاما جاسالدى»، - دەپ اتاپ ءوتتى ۆەدومستۆودان.
كوميتەت قازىرگى ۋاقىتتا ءوز تاراپىنان تەرگەۋ جالعاسىپ جاتقانىن، اۋە رەيستەرىنىڭ كەشىگۋىنە قاتىستى جاڭا فاكتىلەر انىقتالعان جاعدايدا تاسىمالداۋشى قولدانىستاعى زاڭناماعا سايكەس جاۋاپكەرشىلىككە تارتىلاتىندىعىن اتاپ وتەدى.
«بۇعان قوسا، رەيستەر كەشىككەن جاعدايدا اۋە كومپانيالارىنىڭ جاۋاپكەرشىلىگىن كۇشەيتۋ ماقساتىندا قولدانىستاعى زاڭناماعا ءتيىستى تۇزەتۋلەر قاراستىرىلىپ جاتىر. اتاپ ايتقاندا، اتالعان جۇمىس اياسىندا رەيس كەشىككەن جاعدايدا جولاۋشىلارعا تولەنەتىن ايىپپۇل مولشەرىن ارتتىرۋ ماسەلەسى قارالۋ ۇستىندە»، - دەدى كوميتەتتەن.
