استانادا نوسەر جاۋىننان كەيىن ەكسپو اۋماعىندا بىرنەشە عيماراتتى سۋ باستى

نۇر-سۇلتان. قازاقپارات - بۇگىن تولاسسىز جاۋعان جاڭبىر سالدارىنان ەلوردانىڭ EXPO اۋدانىنداعى بىرنەشە عيماراتتى سۋ باسىپ قالدى، دەپ حابارلايدى قازاقپارات.

ولاردىڭ قاتارىندا «Hilton Astana» قوناق ءۇيى دە بار.

قازاقپارات ءتىلشىسىنىڭ ساۋالىنا جاۋاپ بەرگەن قوناق ءۇيدىڭ باسشىلىعى مەيماندار ۋاقىتىلى ەۆاكۋاتسيالانعانىن جەتكىزدى.

«8- تامىز كۇنى شامادان تىس جاۋعان جاۋىن سالدارىنان ەلوردانىڭ EXPO اۋدانىنداعى بىرنەشە عيماراتتى سۋ الىپ كەتتى. ولاردىڭ ىشىندە Hilton Astana قوناق ءۇيى بار. ساعات شامامەن 12:40-تا قوناق ءۇيدىڭ كىرەبەرىسىن سۋ باستى. قوناقتار ۋاقىتىلى ەۆاكۋاتسيالاندى. قازىرگى ۋاقىتتا الدىڭعى كىرەبەرىستىڭ توبەسىنەن اققان سۋ توقتادى. قوناق ءۇي قالىپتى رەجيمدە جۇمىس ىستەپ تۇر. كەلۋشىلەر ءۇشىن ەشقانداي قاۋىپ جوق»، - دەپ ءمالىم ەتتى قوناق ءۇيدىڭ باسشىلىعى.

قوناق ءۇيدىڭ دەرەگىنشە، وقيعانىڭ سەبەبىن تاياۋدا ماماندار انىقتايدى.

سونىمەن قاتار، الەۋمەتتىك جەلىلەردە Astana IT University وقۋ ورنىن سۋ باسىپ كەتكەنى كورسەتىلگەن ۆيدەو تارادى.

اتالعان ۋنيۆەرسيتەتتىڭ باسپا ءسوز قىزمەتى بۇل جاعدايعا رەسمي تۇسىنىكتەمە بەرۋگە ۋادە ەتتى.