قىركۇيەكتەن باستاپ وتباسىنىڭ سيفرلىق كارتاسى جۇزەگە اسىرىلادى
اتاپ ايتقاندا، ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ىشكى ىستەر جانە ادىلەت مينيسترلىكتەرىنىڭ، نۇر- سۇلتان، الماتى، شىمكەنت قالالارى جانە وبلىستار اكىمدىكتەرىنىڭ وكىلدەرىنىڭ قاتىسۋىمەن وتباسىنىڭ تسيفرلىق كارتاسىن ىسكە قوسۋعا دايىندىق بارىسىن تالقىلادى.
جينالىس قورىتىندىسى بويىنشا 1 - قىركۇيەكتەن باستاپ وتباسىنىڭ سيفرلىق كارتاسىن جەكەلەگەن مەملەكەتتىك كەپىلدىك تۇرلەرى بويىنشا پيلوتتى تۇردە جۇزەگە اسىرۋ تۋرالى شەشىم قابىلداندى.
وتباسىنىڭ سيفرلىق كارتاسى - مەملەكەتتىك كەپىلدىكتەر بويىنشا وتباسىنىڭ بازاسى. ول ءاربىر وتباسىنىڭ قۇرامى مەن ءال- اۋقات دەڭگەيىنە قاراي مەملەكەتتىك كەپىلدىك تۇرلەرىن الۋ قۇقىعىن جۇزەگە اسىرۋعا مۇمكىندىك بەرەدى.
«ماسەلەن، ءبىر جاسقا تولماعان بالاسى بار وتباسى بالا تۋۋى بويىنشا بەرىلەتىن جاردەماقى الۋعا قۇقىلى. كامەلەت جاسقا تولماعان ءتورت جانە ودان دا كوپ بالاسى بار وتباسى بالا 18-گە تولعانشا اي سايىن جاردەماقى الادى. مۇگەدەك بالا تاربيەلەپ وتىرعان وتباسى مۇگەدەكتىك بويىنشا بەرىلەتىن جاردەماقى الا الادى. وسىنداي مىسالدار وتە كوپ. وتباسىنىڭ تسيفرلىق كارتاسىن ەنگىزۋ مەملەكەت تاعايىنداعان جاردەماقىلاردى پرواكتيۆتى فورماتتا، ياعني تولەم الۋشىنىڭ ءوتىنىشىن كۇتپەي بەرۋدى كوزدەيدى»، - دەلىنگەن ەڭبەك مينيسترلىگى مالىمەتىندە.
وتباسىنىڭ سيفرلىق كارتاسىنىڭ جۇمىس الگوريتمىنە توقتالساق، مەملەكەتتىك كەپىلدىك الۋعا قۇقىعى بار وتباسىنا ەڭبەك مينيسترلىگىنەن SMS- حابارلاما جولدانادى. وندا ازاماتتىڭ مەملەكەتتىك كەپىلدىك الۋى مۇمكىن ەكەنى جازىلادى. بۇدان بولەك، SMS- حابارلامادا ازاماتقا مەملەكەتتىك كەپىلدىكتى پرواكتيۆتى فورماتتا تاعايىنداۋعا كەلىسۋ نەمەسە كەلىسپەۋ قۇقىعى بەرىلەدى.
ەگەر ازامات كەلىسكەن جاعدايدا، وندا وعان جاردەماقى تاعايىندالادى. ول كەيىن تولەم الۋشىنىڭ شوتىنا تۇسەدى. بۇدان بۇرىن حابارلانعانداي، ەلىمىزدە وتباسىنىڭ تسيفرلىق كارتاسى ازىرلەنىپ جاتىر. مەملەكەت باسشىسى قاسىم- جومارت توقايەۆ ۇكىمەتكە جىل سوڭىنا دەيىن وتباسىنىڭ سيفرلىق كارتاسىن ىسكە قوسۋدى تاپسىردى.
فوتو: chicagoildivorcelawyer.com
اۆتور رۋسلان عابباسوۆ
