قىتايدا روبوتتى اۆتوكولىكتەر سانى ارتپاق
بۇل كولىككە وتىرعان ادام تەك دىتتەگەن جەرىن بەلگىلەيدى. قالعاننىڭ ءبارى اۆتوماتتاندىرىلعان. كولىكتىڭ وسى ءتۇرى قىتايدىڭ بىرنەشە شاھارىندا سىناقتان ءوتىپ جاتىر. جاساپ شىعارۋشى كومپانيانىڭ مەنشىگىندە 500-دەي پيلوتسىز تاكسي بار. روبوتاكسيلەر 2020 -جىلدان باستاپ سىناقتان وتكىزىلە باستادى. كۇنى بۇگىنگە دەيىن ولار ءبىر ميلليوننان اسا جولاۋشىعا قىزمەت كورسەتىپ ۇلگەردى.
20 شاقىرىم قاشىقتىققا 60 يۋان، ياعني 4 مىڭداي تەڭگەگە جەتكىزىپ بەرەدى. كادىمگى تاكسيدەن قىمبات ەمەس. ال وسى اپتادا شەنچجەندە كولىكتىڭ بۇل ءتۇرى زاڭداستىرىلدى. روبوتتار باسقاراتىن كولىكتەر ءۇشىن ەرەجەلەر بەكىتىلىپ، جول اپاتى بولا قالعان جاعدايدا، كىمنىڭ جاۋاپتى بولاتىنىنا دەيىن بەلگىلەندى.
يان دۋنلۋن، شەنچجەن كوممۋنيكاتسيالار دەپارتامەنتى اقىلدى كولىك باسقارماسى جەتەكشىسىنىڭ ورىنباسارى:
- جۇرگىزۋشى وتىرعان پيلوتسىز كولىكتەر جول اپاتىن جاساسا، جۇرگىزۋشىسى جاۋاپقا تارتىلىپ، شىعىنىن وتەيدى. ال تولىق اۆتوماتتاندىرىلعان كولىك ءۇشىن يەسى نەمەسە قىزمەتتى پايدالانۋشى جاۋاپتى. پايدالانۋشى شىعىندى وتەگەننەن كەيىن ەگەر جول اپاتىنا ماشيناداعى اقاۋ سەبەپ بولعانى انىقتالسا، كولىك وندىرۋشىدەن نەمەسە يەسىنەن قاراجاتىن قايتارىپ الا الادى.
الايدا ستاتيستيكاعا سۇيەنسەك، پيلوتسىز كولىكتەر كادىمگى ماشيناعا قاراعاندا قاۋىپسىز. جالپى بۇل تەحنولوگيالار جولداعى قاۋىپسىزدىكتى كۇشەيتۋ ماقساتىندا ەنگىزىلىپ كەلەدى. مامانداردىڭ بولجامىنشا، 2030 -جىلعا قاراي قىتايدا پيلوتسىز كولىك قۇرالدارىنىڭ ۇلەسى 20 پروتسەنتتەن اسۋى مۇمكىن.
