احمەت بايتۇرسىن ۇلىنا ارنالعان مۋزەي-ءۇيدىڭ قۇرىلىسى اياقتالۋعا جاقىن

قوستاناي. قازاقپارات - تورعاي سەلوسىنىڭ احمەت بايتۇرسىن ۇلى اۋىلىندا ۇلت ۇستازىنا ارناپ سالىنىپ جاتقان مۋزەي-ءۇيدىڭ قۇرىلىسى تامىزدىڭ سوڭىنا دەيىن اياقتالادى.

بۇل تۋرالى وبلىس اكىمى ارحيمەد مۇحامبەتوۆ ءوزىنىڭ instagram پاراقشاسىندا جازدى، دەپ حابارلايدى قازاقپارات ءتىلشىسى.

«بۇگىن جۇمىس ساپارىمەن امانگەلدى جانە جانگەلدين اۋداندارىنا باردىم. الدىمەن، «اۋليەكول - جالداما» تاس جولىنىڭ 50 شاقىرىم ۋچاسكەسىنىڭ ورتاشا جوندەۋ بارىسىن تەكسەردىم. جۇمىستارى كەستەگە سايكەس جۇرگىزىلىپ جاتىر. ساپار اياسىندا جانگەلدين اۋدانىنداعى احمەت بايتۇرسىن ۇلى اتىنداعى اۋىل مەن تورعاي سەلوسىنا باردىم. مۇندا تورعاي وزەنى ارقىلى وتەتىن كوپىرگە جۇرگىزىلىپ جاتقان كۇردەلى جوندەۋ جۇمىستارىمەن تانىستىم. كوپىردى جوندەۋگە 200,8 ميلليون تەڭگە قاراجات ءبولىندى. ودان كەيىن ا. بايتۇرسىن ۇلى مۋزەي-ءۇيى مەن مەديتسينالىق پۋنكت قۇرىلىسىنىڭ بارىسىمەن تانىستىم. قازىرگى ۋاقىتتا مۇندا نىساننىڭ ىرگەتاسىن قۇيۋ، شاتىرىن ورناتۋ جۇمىستارى ءجۇرىپ جاتىر. جوندەۋ جۇمىستارىن وسى ايدىڭ سوڭىنا دەيىن اياقتاۋ جوسپارلانىپ وتىر»، - دەپ جازدى قوستاناي وبلىسىنىڭ اكىمى ارحيمەد مۇحامبەتوۆ.

سونىمەن قاتار، ءوڭىر باسشىسى بيىل تورعاي سەلوسىنا قاراستى 16 اۋىلعا 3G/4G ستاندارتىنداعى موبيلدى ينتەرنەت تارتىلاتىنىن جەتكىزدى.

ەسكە سالساق، بۇعان دەيىن مەملەكەتتىك كەڭەسشى ەرلان قارين احمەت بايتۇرسىن ۇلىنىڭ 150 جىلدىق مەرەيتويى اياسىندا ۇيىمداستىرىلاتىن شارالار تۋرالى بايانداعان بولاتىن.