گەننادي گولوۆكين قازاقستاندا تاعى دا جەكپە-جەك وتكىزبەك

نۇر- سۇلتان. قازاقپارات - قازاقستاندىق بوكسشى گەننادي گولوۆكين تۋعان ەلىندە جەكپە-جەك وتكىزۋدى جوسپارلاپ وتىرعانىن ايتتى، دەپ حابارلايدى قازاقپارات Sports.kz سايتىنا سىلتەمە جاساپ.

گولوۆكين Compas On The Beat باسىلىمىنا بەرگەن سۇحباتىندا 17-قىركۇيەكتە ساۋل «كانەلو» الۆارەسپەن وتكەن ءۇشىنشى جەكپە- جەكتەن كەيىن بوكستاعى مانسابىن اياقتاۋ جوسپارى جوق ەكەنىن، ال زەينەتكە شىقپاس بۇرىن قازاقستاندىق جانكۇيەرلەر ءۇشىن ۇلكەن شوۋ كورسەتكىسى كەلەتىنىن ايتتى.

«(...) بولاشاقتا كىممەن، قالاي جانە قايدا جەكپە- جەك وتكىزۋگە قاتىستى جوسپارىم كوپ. مەنىڭ سۇيىكتى قازاقستانىم بار، وندا بوكس كەشىن وتكىزۋ كەرەك دەپ ويلايمىن، ۇلكەن جوسپارلارىم بار، - دەدى GGG. گەننادي كاسىپقوي مانسابىندا قازاقستاندا ءبىر-اق رەت جەكپە-جەك وتكىزگەن. 2010 -جىلى 16-جەلتوقساندا استانادا (قازىرگى نۇر-سۇلتان قالاسى- اۆت.) وتكەن جەكپە-جەگىندە كولۋمبيالىق نيلسون تاپيانى نوكاۋتقا ءتۇسىردى.