ازىق-تۇلىك باعاسىن نەگىزسىز كوتەرگەن وڭىرلەر انىقتالدى
بۇل تۋرالى ق ر ساۋدا جانە ينتەگراتسيا مينيسترلىگى ساۋدا كوميتەتىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.
«سوڭعى اپتادا 40,3 مىڭ دۇكەنگە رەيد جۇرگىزىلدى. ناتيجەسىندە ازىق- تۇلىك باعاسىن نەگىزسىز كوتەرگەن 734 دۇكەن انىقتالدى. الەۋمەتتىك ماڭىزى بار تاۋارلاردى قىمبات باعامەن ساتقانى تۋرالى دەرەكتەر كوبىنە نۇر- سۇلتان قالاسى (278) مەن شىعىس قازاقستان وبلىسىندا (80) تىركەلدى. ودان ءارى تۇركىستان وبلىسىندا – 38، باتىس قازاقستان وبلىسىندا - 33، قوستاناي جانە ماڭعىستاۋ وبلىستارىندا - 32، جەتىسۋ وبلىسىندا - 30 دۇكەن تاۋارعا ۇستەمە قۇن قوسقان. مۇنداي فاكتىلەر ەڭ از انىقتالعانى - ۇلىتاۋ وبلىسىندا. وندا باعانى نەگىزسىز كوتەرگەندەر تۋرالى 6 جاعداي تىركەلدى. الەۋمەتتىك ماڭىزى بار ازىق- تۇلىك باعاسىنا قوسىلعان ۇستەمە 15 پايىزدان اسسا، وندا 300 ا ە ك مولشەرىندە ايىپپۇل سالىناتىنىن ەسكەرتەمىز»، - دەلىنگەن باسپا ءسوز مالىمەتىندە.
قۇزىرلى ورگان رەيد قورىتىندىسى بويىنشا ىشكى ساۋدا سۋبەكتىلەرىنە قاتىستى ەسكەرتۋ تۇرىندە 126 اكىمشىلىك حاتتاما تولتىرىلىپ، 1 ايىپپۇل سالعان. ال كوپشىلىك ساۋدا وبەكتىلەرى ءتۇسىندىرۋ جۇمىستارىنان كەيىن الەۋمەتتىك ماڭىزى بار ازىق- تۇلىك باعاسىن 5-15 پايىزعا دەيىن تومەندەتكەن.
ەسكە سالايىق، بۇعان دەيىن ەلوردادا ازىق- تۇلىك بەلدەۋىن دامىتۋدىڭ جاڭا باعدارلاماسى ازىرلەنىپ جاتقانىن حابارلاپ ەدىك.
