الماتىدا ازىق- تۇلىك قويماسى ورتەندى

الماتى. قازاقپارات - الماتىدا تۇنگى ۋاقىتتا ازىق- تۇلىك قويماسى ورتەندى، دەپ حابارلايدى قازاقپارات ءتىلشىسى.

الماتى قالالىق توتەنشە جاعدايلار دەپارتامەنتىنىڭ مالىمەتىنشە، 4-تامىز كۇنى ساعات 21:42 دە ءورت ءسوندىرۋ بولىمشەلەرى المالى اۋدانى، مۇقانوۆ كوشەسى، 133 مەكەنجايىندا عيماراتتىڭ تۇتىندەۋى تۋرالى شاقىرتۋعا شىقتى.

«ساعات 21:45 تە (3 مينۋتتا) العاشقى ءورت ءسوندىرۋ بولىمشەلەرى كەلگەن ساتتە ازىق- تۇلىگى بار قويمانىڭ تۇتىندەپ جاتقانى انىقتالدى. ءورت ساعات 23:05-تە وقشاۋلاندىرىلىپ، 23:24 تە تولىعىمەن جويىلدى. جالىن شارپىعان اۋماق 600 شارشى مەتردى قۇرادى. ءورتتىڭ جاقىن ماڭداعى اكىمشىلىك عيماراتقا تارالۋىنا جول بەرىلگەن جوق. قازىر وتتىڭ شىعۋ سەبەبى انىقتالىپ جاتىر. قازا بولعاندار مەن زارداپ شەككەندەر جوق»، - دەپ حابارلادى قالالىق ت ج د- دان.