استانادا «مەرەيلى وتباسى» بايقاۋىنىڭ ۇزدىكتەرى ماراپاتتالدى

نۇر- سۇلتان. قازاقپارات - نۇر- سۇلتان قالاسىندا «مەرەيلى وتباسى» بايقاۋىنىڭ ۇزدىكتەرى سالتاناتتى تۇردە ماراپاتتالدى، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.

«مەرەيلى وتباسى» ۇلتتىق كونكۋرسى وتباسى قۇندىلىقتارىن ناسيحاتتاۋ، وتباسى مارتەبەسىن ارتتىرۋ ماقساتىندا جىل سايىن وتكىزىلەدى. بيىل كونكۋرسقا قاتىسۋعا 151 وتباسى قۇجات تاپسىردى (2019 -جىلى - 63, 2021 -جىلى - 120). ءىس- شارا كەزىندە كورەرمەن قاۋىم ءار جانۇيانىڭ ومىربايانىمەن تانىستى. ەكراندا وتباسىلار جايلى بەينەماتەريالدار كورسەتىلدى.

جەڭىمپاز وتباسىلار: Ⅲ ورىن ايتقۇلوۆتار جانە جۇنىسبەكوۆتەر وتباسى.

Ⅱ ورىن اۋەلوۆتەر جانە ولجابايەۆتار وتباسى.

I ورىن ساعيتوۆتار اۋلەتى. ساعيتوۆتار اۋلەتى بۇگىندە 3 قىز، 3 ۇل تاربيلەپ وتىر. وتاعاسى دۋلات ساعيتوۆ 45 جاستا. مۇمكىندىگى شەكتەۋلى جاندارعا ارنالعان پاراليمپيادالىق جاتتىعۋ ورتالىعىندا جۇمىس ىستەيدى. انالارى ايناگۇل ساعيتوۆا 40 جاستا. قىزدارىنىڭ ءبارى رەسپۋبليكالىق بي جارىستارىنا قاتىسىپ، جۇلدەلى ورىندارعا يە بولعان. ولاردىڭ ءبىرى كوركەم گيمناستيكادان 1-رازريادقا يە. ۇلكەن ۇلى «استانا» حوككەي كلۋبىندا سپورتتىق كارەراسىن باستاعان.

سونداي- اق 10 اۋلەت ءتۇرلى نوميناتسيا بويىنشا ۇزدىك دەپ تانىلدى: «ۇلگىلى وتباسى» نوميناتسياسى - نۇرعاليەۆتار وتباسى؛

«ونەگەلى وتباسى» نوميناتسياسى - ايتقوجيندەر وتباسى؛

«قايىرىمدى وتباسى» نوميناتسياسى - قۇسايىنوۆتار وتباسى؛

«دارىندى وتباسى» نوميناتسياسى- ەرجۇمانوۆتار وتباسى؛

«شىعارماشىل وتباسى» نوميناتسياسى - پتاشينسكييلەر وتباسى.

«جاس وتباسى» نوميناتسياسى- اۋەزوۆتەر وتباسى؛

«بەرەكەلى وتباسى» نوميناتسياسى - سەرىكبايەۆتار وتباسى؛

«سالاۋاتتى وتباسى» نوميناتسياسى - رۋزاحۋنوۆتار وتباسى؛

«قايسار وتباسى» نوميناتسياسى - بۇزاۋوۆتار وتباسى؛

«ۇلاعاتتى وتباسى» نوميناتسياسى - جاقىپوۆتار وتباسى.

«ونەگەلى وتباسى - ەلدىڭ تۇتقاسى! جاراسىمدى جانۇيا مەن ىزگىلىكتى قاسيەتتەرگە تولى اۋلەت قاشان دا كوپكە ۇلگى بولۋى ءتيىس. وسى ماقساتتا 2013 -جىلى مەملەكەت باسشىسىنىڭ باستاماسىمەن «مەرەيلى وتباسى» ۇلتتىق كونكۋرسى جاريالانعان بولاتىن»، - دەدى ەلوردا اكىمىنىڭ ورىنباسارى ەسەت بايكەن.