يزرايل عالىمدارى ەرەكشە پرينتەر ويلاپ تاپتى

نۇر- سۇلتان. قازاقپارات - قالدىقتاردىڭ كوبەيۋى اتموسفەراعا مەتاننىڭ بولىنۋىنە اكەلەدى. ال قايتا وڭدەۋ ءادىسى جاھاندىق كليمات وزگەرىسىن باياۋلاتۋعا ءوز ۇلەسىن قوسادى.

قازىر قورشاعان ورتانىڭ ساپاسىن جاقسارتۋ ءۇشىن ءتۇرلى ءادىس- تاسىلدەر مەن تەحنولوگيالار شىعىپ جاتىر.

يزرايل عالىمدارى قاعازدى بىرنەشە رەت قولدانۋ ءۇشىن ونى لازەرمەن تازالايتىن ەرەكشە پرينتەر ويلاپ شىعاردى، دەپ حابارلايدى «حابار 24».

يزرايلدەگى مىنا پرينتەردىڭ مىندەتى ءبىز قولدانىپ جۇرگەن پرينتەردەن وزگەشە. ونىمەن قاعازعا باسىلعان ءماتىندى مۇلدەم ءوشىرىپ تاستاۋعا بولادى. سيا لازەردىڭ كومەگىمەن جويىلادى. ماماندار بۇل قۇرىلعى ارقىلى ءبىر قاعازدى 10 رەت قولدانۋعا بولادى دەيدى. جاڭا تەحنولوگيا قورشاعان ورتانىڭ لاستانباۋىنا دا سەپتىگىن تيگىزبەك، ءارى تابيعي رەسۋرستاردى ساقتاۋعا تاپتىرماس مۇمكىندىك بەرەدى.

باراك يەكۋتيەلي، ءوندىرۋشى كومپانيانىڭ باس ديرەكتورى:

- سيركۋليارلىق ەكونوميكانىڭ العا باسۋىنا كەرەمەت مۇمكىندىك. وندىرىستە دە وزگەرىستەر بولادى. ەندى ادەتتەگىدەي تۇتىنۋ مودەلى بولمايدى. قازىر ءبىز كليماتتىڭ وزگەرۋىنە باسا ءمان بەرۋىمىز كەرەك. قولداعى تاۋاردى ءبىر ەمەس بىرنەشە مارتە قايتا قولدانعانىمىز ابزال. الەمدىك ءوندىرۋشى كومپانيالار بىرنەشە رەت پايدالانۋعا بولاتىن قاعازدار شىعارعانى ءجون. ال ءبىز ءوز تەحنولوگيامىزدى كورسەتۋگە دايىنبىز.

قاعاز قايتا وڭدەۋگە جارامدى ەڭ كوپ كەزدەسەتىن ماتەريالدىڭ ءتۇرى. ماكۋلاتۋرانى تيپوگرافيالىق قاعاز، قاپتاما، سونىمەن قاتار، قۇرىلىسقا ارنالعان ءتۇرلى زاتتاردى جاساپ شىعارۋ ءۇشىن پايدالانادى. مىسالى، 2020 -جىلى ەۋروپادا قولدانعان قاعازدىڭ 70 پروتسەنتى قايتا وڭدەلىپ، كادەگە جارادى.

مايكل ۋوكەر، رەداكتور:

- الەمدە پايدالانعان قاعازداردىڭ باسىم بولىگى قايتا وڭدەۋ ادىسىنەن ءوتتى. مەنىڭ ويىمشا ونى كەمىندە 5 رەت قولدانۋعا بولار ەدى. الەمدە قاعازدان بولەك پلاستيك قالدىقتارىن جيناپ، ونى وڭدەۋ ماسەلەسى وزەكتى. شيكىزاتتىڭ تۇرىنە قاراي وعان ەكىنشى ءومىر بەرۋ ءۇشىن سان ءتۇرلى تەحنولوگيا قولدانىلادى. ءبىراق ناتيجە ءار كەز كوڭىلدەن شىعا بەرمەيدى.

بۇگىندە قوقىسقا تاستالعان قالدىقتاردىڭ تەڭ جارتىسى قايتا وڭدەۋگە جارامسىز. اراسىندا ەلەكتروندى زاتتار كوپ. ولاردىڭ قايتا وڭدەۋ جارامدىلىعى تەك 15 پروتسەنتتى قۇرايدى دەيدى ماماندار.