اتىراۋلىق جالبىز بەن جاۋىنقۇرت وسىرۋدەن تابىس تاۋىپ وتىر

اتىراۋ. قازاقپارات - اتىراۋلىق ايەل جالبىز بەن جاۋىنقۇرت وسىرۋدەن تابىس تاۋىپ وتىر، دەپ حابارلايدى قازاقپارات ءتىلشىسى.

اتىراۋ قالاسىندا تۇراتىن انار بەكمامبەتوۆانىڭ ايتۋىنشا، جاۋىنقۇرت - توپىراقتى قۇنارلاندىرۋعا تاپتىرمايتىن ءتاسىل. ول وسى كاسىپتى جىل باسىندا باستاعان.

«بۇل كاسىپتى قولعا الۋىمنىڭ ءوزى قىزىق بولدى. كۇيەۋبالا جاڭا جىل مەرەكەسىنە ءبىر قوراپ جاۋىنقۇرتىن اكەلىپ بەردى. بۇل - كاليفورنيالىق جاۋىرقۇرتى. سودان ونى زەرتتەپ، ۇيدە ءوسىرۋدى باستادىم. جاۋىنقۇرت كوبەيە ءتۇستى. سوسىن تاعى ساتىپ الدىم. قازىر 400 مىڭعا جەتتى. ونى 40 شارشى مەتر اۋماقتا ءوسىرىپ وتىرمىن»، - دەيدى انار بەكمامبەتوۆا.

كاسىبىن ءۇي ىرگەسىنەن اشقان ول قۇرتتارعا مالدىڭ تەزەگىن، مەن جەمىس- جيدەك، كوكونىستەردىڭ قالدىعىن بەرەدى. مۇنداي ورگانيكالىق تىڭايتقىشتاردى اۋىل ىشىنەن تابۋ قيىن ەمەس. الايدا، جاۋىنقۇرتىنىڭ كاليفورنيالىق ءتۇرى جوعارى باعالاناتىندىقتان، ونىڭ كۇتىمى دە سوعان ساي بولۋى قاجەت.

«قازىر كاليفورنيالىق جاۋىنقۇرتتىڭ نارىقتاعى قۇنى 1 شارشى مەترىنە 150 مىڭ تەڭگە تۇرادى. قۇرتتاردى دەرناسىل كەزىندە مالدىڭ قيى مەن جەمىس- جيدەك قالدىعىنا تاستايمىن. ءۇش ايدا قالدىقتى قورىتىپ بەرەدى. سودان سوڭ قۇرتتاردى ەلەكپەن ەلەپ، ساتۋعا ازىرلەپ قويامىن. قالعانىن قايتادان قالدىقتاردى قورىتۋعا جىبەرەمىن. بۇل پروتسەسس وسىلاي توقتاۋسىز جالعاسا بەرەدى»، - دەيدى انار بەكمامبەتوۆا.

ول ءۇيىنىڭ اۋلاسىندا تەك جاۋىنقۇرتتى وسىرۋمەن شەكتەلمەيدى. بۇعان قوسا جەمىس- جيدەك پەن كوكونىستىڭ سان ءتۇرىن ءوسىرىپ وتىر. سونىڭ قاتارىندا شەتەلدەن تاسىمالداناتىن ماروككو جالبىزى بار.

«ماروككو جالبىزىن ارىپتەسىمنىڭ كەڭەسىمەن ءوسىرۋدى قولعا الدىم. ارىپتەسىم مۇنداي جالبىزدىڭ قات ەكەنىن، ساتىلىمداعى باعاسى قىمبات ەكەنىن ايتتى. راسىندا دا سولاي ەكەن. بىردەن 1 كەلى جالبىزدى ساتىپ اكەلىپ، 2 اپتا ابدەن تامىر جايعانشا باپتادىم. سودان سوڭ اۋلاعا ەكتىم. ەندى سۇرانىستىڭ كوپتىگىنەن، جالبىزداردى ءوسىرىپ ۇلگەرمەي وتىرمىن»، - دەيدى كاسىپكەر.

ەندى ول قۇرت پەن جالبىز ءوسىرۋ ءىسىن كەڭەيتپەك ويى بار. ويتكەنى، وعان شارۋالاردان سۇرانىس كوپ. قولىنان كەلەتىن كاسىپتى جانداندارىپ، بيوگۋمۋسپەن جەرگىلىكتى ەگىنشىلەردى قامتاماسىز ەتۋدى كوزدەپ وتىر.

«قۇرت ءوسىرۋدىڭ پايداسى مول ەكەن. الدىمەن ەڭبەكقورلىققا بەيىمدەلدىم. ەكىنشىدەن، ءوڭىردىڭ تۇزدى توپىراعىن قۇنارلاندىرا الامىز. ۇشىنشىدەن، كولەمىن ارتتىرىپ، رەسپۋبليكانى قامتاماسىز ەتە الساق، سىرتتان ساتىپ المايمىز. ءوز اقشامىز وزىمىزدە قالادى»، - دەيدى باعبان.

ەسكە سالا كەتەلىك، بۇعان دەيىن اتىراۋ وبلىسىندا كاسىپكەرلىكتى قولداۋعا 8 ميلليارد تەڭگە بولىنگەنىن حابارلاعان ەدىك.