جەتىسۋ وبلىسىندا مەملەكەتتىك قىزمەت ىستەرى اگەنتتىگى دەپارتامەنتىنىڭ باسشىسى تاعايىندالدى

نۇر-سۇلتان. قازاقپارات - جاڭا قۇرىلعان جەتىسۋ وبلىسى بويىنشا مەملەكەتتىك قىزمەت ىستەرى اگەنتتىگىنىڭ (م ق ءى ا) اۋماقتىق دەپارتامەنتىنىڭ باسشىسى تاعايىندالدى، دەپ حابارلايدى قازاقپارات ق ر م ق ءى ا باسپا ءسوز قىزمەتىنە سىلتەمە جاساپ.

قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ جەتىسۋ وبلىسى بويىنشا دەپارتامەنتىنىڭ باسشىسى، ادەپ جونىندەگى كەڭەستىڭ ءتوراعاسى لاۋازىمىنا قوبىلان ماناپ تاعايىندالدى.

قوبىلان توقبەرگەن ۇلى ماناپ 1975 -جىلى كوكسۋ اۋدانى الماتى وبلىسىندا دۇنيەگە كەلگەن. ءى. جانسۇگىروۆ اتىنداعى جەتىسۋ ۋنيۆەرسيتەتىنىڭ «ەڭبەك جانە تەحنيكالىق شىعارماشىلىق» جانە «قۇقىقتانۋ» ماماندىقتارىن، م. تىنىشپايەۆ اتىنداعى قازاق كولىك جانە كوممۋنيكاتسيالار اكادەمياسى مەن قازاق ۇلتتىق اگرارلىق ۋنيۆەرسيتەتىن بىتىرگەن. مەملەكەتتىك قىزمەتتەگى جالپى ەڭبەك ءوتىلى 14 جىلدان اسادى. مەملەكەتتىك قىزمەتتە ەڭبەك جولىن الماتى وبلىسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ باس مامانى بولىپ باستاعان. وسى مەملەكەتتىك ورگاندا ءبولىم باسشىسى، باسقارما باسشىسىنىڭ ورىنباسارى، باسقارما باسشىسى بولعان.

2011-2020 -جىلدارى الماتى وبلىسى ەسكەلدى اۋدانىنىڭ اكىمى، الماتى وبلىسىنىڭ كاسىپكەرلىك باسقارماسى، الماتى وبلىسى اكىمى اپپاراتى، الماتى وبلىستىق ساۋلەت جانە قالاقۇرىلىس باسقارماسى باسشىسىنىڭ ورىنباسارى بولىپ قىزمەت اتقارعان. دەپارتامەنت باسشىسى لاۋازىمىنا تاعايىندالعانعا دەيىن ق. ت. ماناپ قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ الماتى وبلىسى بويىنشا دەپارتامەنتى باسشىسىنىڭ ورىنباسارى، ادەپ جونىندەگى كەڭەس حاتشىلىعىنىڭ مەڭگەرۋشىسى بولدى.