بالا اسىراپ الۋ تالاپتارىنا وزگەرىس ەنگىزۋ ۇسىنىلدى

نۇر- سۇلتان. قازاقپارات - جەتىمدەر ۇيىنەن بالا اسىراپ الۋ تارتىپتەرى وزگەرۋى مۇمكىن، دەپ حابارلايدى قازاقپارات ءتىلشىسى.

وقۋ- اعارتۋ مينيسترلىگى ۇسىنىپ وتىرعان قۇجاتتا «تۋىستار» جانە «جاقىن تۋىستار» دەگەن ۇعىمدار ەنگىزىلگەن. جاقىن تۋىستار - اتا- انا، اتا- اناسى ءبىر جانە بولەك اعالى- ىنىلەر مەن اپالى- سىڭلىلەر، اتا مەن اجە جانە نەمەرەلەر. ال، تۋىستار - ۇلكەن اتاسى مەن ۇلكەن اجەسىنە دەيىنگى بۋىندا ورتاق اتا- بابالارى بار تۋىستىق بايلانىستاعى ادامدار.

سونداي- اق، جاڭا نورمانىڭ ءبىرى - بالا اسىراپ الۋشىلاردىڭ دەنساۋلىق جاعدايىنا قاتىستى مالىمەتتەر. بۇرىن تەك بالانى اسىراپ الۋعا نيەتتى ادامنىڭ دەنساۋلىعى تۋرالى اقپارات سۇرالاتىن. ەندى باۋىرىنا بالا باسقىسى كەلگەن ازامات نەكەدە بولسا، وندا ول جۇبايىنىڭ نەمەسە جولداسىنىڭ جۇقپالى دەرتپەن اۋىرماعانىن جانە ناركولوگيالىق، پسيحولوگيالىق تىركەۋدە تۇرمايتىنىن راستاۋى قاجەت.

بۇدان وزگە، بالا اسىراپ الۋشى قۇزىرلى ورگانعا پسيحولوگيالىق دايارلىقتان وتكەنى تۋرالى سەرتيفيكات ۇسىنۋى ءتيىس. قۇجات بالا اسىراپ الىنعان ۋاقىتتان كەيىن ءبىر جىل ىشىندە جەرگىلىكتى ءبىلىم باسقارمالارىنا بەرىلۋى قاجەت. وزگەرىستەر ەنگىزىلگەلى وتىرعان بۇيرىق 16 -تامىزعا دەيىن اشىق تالقىلاۋعا شىعارىلدى.

ەسكە سالا كەتەيىك، بۇعان دەيىن جەتىم بالالار مەن الەۋمەتتىك از قامتىلعان وتباسىنان شىققان ەلوردالىق تۇلەكتەردىڭ وقۋ اقىسى تولەنەتىنىن جازعان ەدىك.