ماڭعىستاۋدا اۋىل تۇرعىندارى بۇرالقى يتتەر ماسەلەسىمەن اكىمدىك الدىنا جينالدى

اقتاۋ. قازاقپارات - ماڭعىستاۋ وبلىسى ءتۇپقاراعان اۋدانىنا قاراستى سايىن شاپاعاتوۆ اۋىلىنىڭ تۇرعىندارى بۇرالقى يتتەردىڭ مال- جاندى قاۋىپ، تۇرعىنداردىڭ ومىرىنە قاۋىپ تۋدىرىپ وتىرعانىنا شاعىمدانىپ، اكىمدىكتىڭ الدىنا جينالدى، دەپ حابارلايدى قازاقپارات ءتىلشىسى.

«يتتەر بىرنەشە ەشكىمدى جەدى. مال ءۇشىن كەلىپ تۇرعان جوقپىن. بۇلار ادامعا ءاۋىپ تۋدىرىپ وتىر. كورشى بالانى جاراقاتتادى. ادامدى تالاپ جاتىر. مىنا حالىقتىڭ جان ايقايىن كىم ويلايدى؟ ! ءيتتى جوق قىلۋ كەرەك. يت اتپايدى دەگەن - سۇمدىق. بۇل يتتەر ۇيدەن شىققان يتتەر ەمەس، كوشەنىڭ يتتەرى. قالادان اكەلىپ توگىپ كەتىپ وتىر. ءيتتى اتۋعا بۇرىن زاڭ بولدى عوي، سونى قايتىپ ەنگىزسىن»، - دەدى اۋىل تۇرعىنى اسىلتاس قۋاتبايەۆا.

قازىر سايىن شاپاعاتوۆتا 700 دەن استام بۇرالقى يت ءجۇر. تۇرعىندار وقۋ جىلى باستالعانشا يتتەردى ازايتىپ، حالىقتىڭ قاۋىپسىزدىگىن قامتاماسىز ەتۋىن تالاپ ەتىپ وتىر.

«بىزدە جاپا- تارماعاي بۇرىنعىداي كوشەگە شىعىپ يت اۋلاۋ دەگەن جوق. 2022 -جىلدىڭ ناۋرىز ايىنان باستاپ زاڭعا وزگەرىس ەنگىزىلدى. ءبىراق، تۇرعىنداردىڭ تالاپ، ارىز، وتىنىشتەرى بويىنشا يت اۋلاۋ جۇمىستارى ءجۇرىپ جاتىر. ءبىر اپتانىڭ شاماسىندا تۇرعىنداردان 30 شاعىم ءتۇستى. ءتۇپقاراعان اۋداندىق ۆەتەريناريا ستانتسياسى بىزگە ءدارى- دارمەك بەرەدى. ءدال قازىر قولىمىزدا ءدارى جوق. جۋىردا الىپ كەلەمىز»، - دەدى اۋىل اكىمى سايران قىلىش.