وڭتۇستىك قىتاي تەڭىزىندە اسكەري جاتتىعۋ باستالدى

نۇر-سۇلتان.قازاقپارات - وڭتۇستىك- شىعىس قىتاي تەڭىزىندە قىتاي اسكەرىنىڭ جاتتىعۋى باستالدى.

فۋجيان پروۆينتسياسىنىڭ اسكەري باسشىلىعى جاتتىعۋدىڭ فوتوسۋرەتتەرى مەن بەينەجازبالارىن جاريالادى. بۇل تايۆان ارالىنا جاقىن ورنالاسقان ايماق. رەسمي اقپارات بويىنشا، جاتتىعۋدىڭ باستى ماقساتى - كۇردەلى جاعدايدا جالپى جاۋىنگەرلىك الەۋەتتى پىسىقتاۋ بولىپ وتىر. فۋجيان پروۆينتسياسىنىڭ بىرنەشە قالاسىندا اۋەرەيستەر كەيىنگە قالدى. اقپارات قۇرالدارى بۇل جاتتىعۋدى ا ق ش كونگرەسسى وكىلدەرى پالاتاسىنىڭ سپيكەرى نەنسي پەلوسيدىڭ ازيا ەلدەرىنە ساپارىمەن بايلانىستىرىپ وتىر. وسى ساپارى بارىسىندا ول تايۆانعا دا بارۋى مۇمكىن. قىتاي باسشىلىعى تايۆان ارالىن ءوز ەلىنىڭ اجىراماس بولىگى رەتىندە سانايدى.

ەسكە سالىپ كەتسەك، 1949-جىلى قىتايدا ازامات سوعىسىندا ماۋ زىدۋڭ باستاعان كوممۋنيستتەر جەڭىسكە جەتكەننەن كەيىن، گوميندان ۇكىمەتى تايۆان ارالىنا قاشىپ كەتكەن بولاتىن. ءتىپتى 1971 -جىلعا دەيىن ب ۇ ۇ- نىڭ قاۋىپسىزدىك كەڭەسىندە قىتاي مەملەكەتىنىڭ ورنىن تايۆان وكىلى يەلەنگەن ەدى.

www.24.kz