الماتىدا تاريحي ورتالىقتىڭ شەكاراسى بەلگىلەندى

الماتى. قازاقپارات - الماتىدا نۇكتەلى قۇرىلىسقا جول بەرمەۋ ماقساتىندا تاريحي ورتالىقتىڭ شەكاراسى بەلگىلەندى.

بۇل تۋرالى ونلاين بريفينگ بارىسىندا الماتى قالالىق جەر قاتىناستارى باسقارماسىنىڭ باسشىسى ارداق سامامبەتوۆ ايتتى، دەپ حابارلايدى قازاقپارات ءتىلشىسى. سپيكەردىڭ سوزىنشە، الماتى قالاسىنىڭ تاريحي ورتالىعىنىڭ شەكاراسىن بەلگىلەۋ ماسەلەلەرى باسقارمانىڭ ەرەكشە باقىلاۋىندا.

«نۇكتەلى قۇرىلىس سالۋعا جول بەرمەۋ ماقساتىندا تاريحي ورتالىقتىڭ شەكاراسى بەلگىلەندى، ونىڭ شەگىندە مەملەكەت مۇقتاجى ءۇشىن الىپ قويۋعا جانە ساتىپ الۋعا جاتاتىن 7 ۋچاسكە انىقتالدى. ولاردىڭ ورنىندا اباتتاندىرۋ، كوگالداندىرۋ جۇمىستارى جۇرگىزىلەدى. قازىرگى ۋاقىتتا 4 جەر ۋچاسكەسى ساتىپ الىندى»، - دەيدى ارداق سامامبەتوۆ.

سونىمەن قاتار، ول ەمحانا سالۋ ماقساتىندا ليەۆيتان كوشەسىنىڭ وڭتۇستىگىنەن، گاگارين داڭعىلىنىڭ باتىسىنان جەر ۋچاسكەسى تاركىلەنگەنىن اتاپ ءوتتى.

«سونىمەن قاتار، حالىقتى ساپالى مەديتسينالىق قىزمەتپەن قامتاماسىز ەتۋ ءۇشىن ءال- فارابي داڭعىلىنىڭ وڭتۇستىگىنە قاراي جانە سىرعابەكوۆ كوشەسىنىڭ شىعىسىنا قاراي 500 كەلۋشىگە ارنالعان ەمحانا سالۋ ءۇشىن 1,3 گەكتار جەر تەلىمى ءبولىندى. شىعىس اينالما جولى، ءال- فارابي داڭعىلى، ساين كوشەسى، جاندوسوۆ كوشەسىنىڭ وڭتۇستىگىنە قاراي اۋىل شارۋاشىلىعى ماقساتىنداعى جەر تەلىمدەرىن بولۋگە جانە تاۋ بوكتەرىندە از قاباتتى ۇيلەر سالۋعا تىيىم سالىنادى»، - دەيدى ول.

بريفينگ بارىسىندا مەملەكەتتىك جەر قورىن ۇلعايتۋ ماقساتىندا جالپى اۋدانى 19,54 گەكتار 22 جەر ۋچاسكەسى رەزەرۆكە قويىلعانى بەلگىلى بولدى.

«2022 -جىلدىڭ سوڭىنا دەيىن سەيفۋللين داڭعىلى مەن جانسۇگىروۆ كوشەسىنىڭ قيىلىسىندا كولىك ايىرىعىن سالۋ، سونداي- اق ساين كوشەسىن رىسقۇلوۆ داڭعىلىنان موڭكە بي كوشەسىنە دەيىن ۇزارتۋ جانە اباي داڭعىلىن قالا شەكاراسىنا دەيىن سوزۋ (اباي ساياجايلارى) جوباسى بويىنشا جەر تەلىمدەرىن ساتىپ الۋدى اياقتاۋ جوسپارلانۋدا»، - دەيدى باسقارما باسشىسى.

ال، 2023 -جىلى مەدەۋ اۋدانىندا رىسقۇلوۆ داڭعىلى بويىنداعى اينالمالى ەستاكادا قۇرىلىسىنا، ياسساۋي كوشەسىنەن قالا شەكاراسىنا دەيىن تولە بي كوشەسىن ۇزارتۋعا، ف. وڭعارسىنوۆا كوشەسىنەن قالا شەكاراسىنا دەيىن رىسقۇلوۆ داڭعىلىن ۇزارتۋ ءۇشىن، مومىش ۇلى كوشەسىنەن قالا شەكاراسىنا دەيىن جۇبانوۆ كوشەسىن ۇزارتۋعا جانە «قالقامان» ستانتسياسى بويىنشا جەر تەلىمدەرىن ساتىپ الۋدى اياقتاۋ كوزدەلگەن.