ەلوردادا ەكى جاسار ءسابي كارىز قۇدىعىنا ءتۇسىپ كەتتى
Telegram-داعى Astanovka98 پاراقشاسى تاراتقان مالىمەتكە سايكەس، وقىس وقيعا مينيسترلىكتەر ءۇيى ايالداماسى جانىندا ورىن العان. بەسىك اربا سۇيرەتكەن اناسىمەن قاتار كەلە جاتقان ءسابي كارىز قۇدىعىنىڭ قاقپاعىنىڭ ۇستىمەن ءوتىپ بارا جاتقاندا ول اشىلىپ كەتىپ، ىشىنە تۇسكەن. وقىس وقيعاعا كۋا بولعان ازاماتتىڭ ءبىرى قۇدىقتىڭ ىشىنە ءتۇسىپ، ءسابيدى الىپ شىققان. نۇر- سۇلتان قالالىق قوعامدىق دەنساۋلىقتى ساقتاۋ باسقارماسى سابيگە قاجەتتى كومەك كورسەتىلىپ، امبۋلاتورلىق ەم الۋعا جىبەرىلگەندىگىن حابارلادى.
«بۇگىن تراۆماتولوگيالىق پۋنكتكە 2020 -جىلى دۇنيەگە كەلگەن ءسابي ءتۇسىپ، ونى نەيروحيرۋرگ پەن تراۆماتولوگ قارادى. بالا قاراعان كەزدە ەس- ءتۇسىن بىلەدى، مازاسىز ەمەس. وعان قاجەتتى بارلىق كومەك كورسەتىلدى. سىنعان جەرى جوق، ميى شايقالماعان. كەڭەس بەرىلدى. قازىرگى ۋاقىتتا بالا امبۋلاتورلىق ەم الۋعا جىبەرىلدى»، - دەدى دەپارتامەنتتەن.
