برازيليادا دارىگەرلەر سيام ەگىزدەرىن ءبىر-بىرىنەن اجىراتىپ الدى
ريو- دە- جانەيرودا ءۇش جاستاعى بەرناردو مەن ارتۋر ليماعا لوندونداعى گرەيت- ورموند- ستريت اۋرۋحاناسىنان كەلگەن دارىگەرلەردىڭ باسشىلىعىمەن وتا جاسالدى. دارىگەرلەر كومپيۋتەرلىك توموگرافيا مەن ماگنيتتىك- رەزونانستىق توموگرافيا نەگىزىندە ۇلداردىڭ اناتومياسىنىڭ ۆيرتۋالدى مودەلىن جاساپ، ولاردى اجىراتۋدىڭ قاۋىپسىز ءادىسىن تابۋعا بىرنەشە اي جۇمسادى. حيرۋرگ نۋر ۋل وۆاسە دجيلاني وتانى «عارىش ءداۋىرىنىڭ ءونىمى» دەپ اتادى.
ونىڭ ايتۋىنشا، حيرۋرگتار العاش رەت ءارتۇرلى ەلدەردە وتىرىپ، ءبىر «ۆيرتۋالدى بولمەدە» بىرگە جۇمىس ىستەگەن. Gemini Untwined كلينيكاسىنىڭ نەگىزىن قالاۋشى دارىگەر دجيلاني بۇعان دەيىن پاكىستان، سۋدان، يزرايل جانە تۇركيادان كەلگەن سيام ەگىزدەرىنە وتا جاساعان. ەگىزدەردى كلينيكاعا اتا-اناسى ەكى جارىم جىل بۇرىن اكەلگەن جانە وسى ۋاقىت بويى باقىلاۋدا بولعان. ەگىزدەرگە بىرنەشە رەت وتا جاسالدى. ليما ەگىزدەرى بارلىعى جەتى وتادان ءوتتى. سوڭعى وتا 27 ساعاتقا سوزىلدى. وعان 100-دەن استام دارىگەر قاتىستى. بەرناردو مەن ارتۋر اجىراتىلعاننان كەيىن قان قىسىمى مەن جۇرەك سوعىسى بىردەن جوعارىلاعان. بۇل بارلىق سيام ەگىزدەرىندە بولىنگەننەن كەيىن بولاتىن جاعداي. ءتورت كۇننەن سوڭ ولار ءبىر پالاتاعا جاتقىزىلدى. ءبىر-ءبىرىنىڭ قولىنان ۇستاعاننان كەيىن كورسەتكىشتەرى قالىپقا كەلگەن. ەندى ولار التى اي ساۋىقتىرۋدان وتەدى. ستاتيستيكا بويىنشا سيام ەگىزدەرى 50-60 مىڭ جاعدايدا ءبىر رەت دۇنيەگە كەلەدى. ولاردىڭ %5 كرانيوپاگتار، ياعني باس سۇيەكتەرى بىرىگىپ تۋادى.
