قىتايدا اۆتوپيلوت رەجيمىندە جۇرەتىن كولىكتەر زاڭداستىرىلدى

بەيجىڭ. قازاقپارات - قىتايدىڭ شىنجىن قالاسىنىڭ بيلىگى العاش رەت مەگاپوليستە جۇرگىزۋشىنىڭ باسقارۋىنسىز جۇرەتىن «اقىلدى كولىكتەردى» پايدالانۋ ەرەجەلەرىن جاريالادى.

ول 1- تامىزدان باستاپ كۇشىنە ەندى.

بۇل تۋرالى قالالىق زاڭ شىعارۋشى ورگان قابىلداعان قاۋلىدا ايتىلعان، دەپ حابارلايدى قازاقپارات ءتىلشىسى.

ەرەجەگە سايكەس، كولىكتى اۆتونومدى باسقارۋدىڭ ءۇش دەڭگەيى ەنگىزىلەدى.

ءبىرىنشىسى - شارتتى اۆتوماتتى جۇرگىزۋ. وندا كولىك جۇرگىزۋشىنىڭ جارتى مىندەتى اۆتوماتتى تۇردە باسقارىلادى.

ەكىنشىسى - تەمىرتۇلپار اۆتوپيلوت رەجيمىندە جۇرگىزۋشىنىڭ بۇكىل فۋنكسياسىن اتقارادى.

ءۇشىنشىسى - تولىق اۆتوماتتاندىرىلعان پروتسەسس. ەرەجەنىڭ العاشقى ەكى دەڭگەيىندە كولىك قۇرالىن باسقارۋعا جۇرگىزۋشى قاتىسۋى ءتيىس.

ال، ءۇشىنشى دەڭگەيدە «اقىلدى تەمىرتۇلپار» جۇرگىزۋشىنىڭ قاتىسۋىنسىز مەجەلى جەرگە ءوزى اپارادى. سونىمەن قاتار، مۇنداي ساناتتاعى كولىكتەردىڭ قاتىسۋىمەن بولاتىن جول-كولىك وقيعالارىنا قاتىستى ارنايى جاۋاپكەرشىلىك ەنگىزىلەدى.

ماسەلەن، اۆتونومدى باسقارىلاتىن كولىكتە جۇرگىزۋشى وتىرعان كەزدە اپات بولسا، وندا جۇرگىزۋشى كىنالى بولادى. مۇنداي جاعدايدا ول زارداپ شەككەن تاراپقا وتەماقى تولەۋگە مىندەتتەلەدى.

ەگەر كولىكتە جۇرگىزۋشى جوق كەزدە جول-كولىك وقيعاسى ورىن السا، وندا كولىكتىڭ يەسى جاۋاپكەرشىلىككە تارتىلادى.

ال «اقىلدى تەمىرتۇلپاردىڭ» اقاۋىنا بايلانىستى اپات بولسا، وندا ونىڭ يەسى كولىكتى قۇراستىرعان كومپانيادان وتەماقى تالاپ ەتۋگە قۇقىلى. جۇرگىزۋشىنىڭ تىكەلەي باسقارۋىن تالاپ ەتپەيتىن كولىكتەر قالانىڭ بەلگىلەنگەن ايماقتارىنداعى ارنايى جولداردا عانا جۇرە الادى.