اتىراۋ وبلىسىندا جايىققا باتقان اۋدان اكىمىنىڭ ءمايىتى تابىلدى
وڭىرلىك كوممۋنيكاتسيالار قىزمەتىنىڭ اقپاراتىنا قاراعاندا، ماحامبەت اۋدانىنىڭ اكىمى رينات جانقىلىشتىڭ دەنەسى بۇگىن، 1-تامىزدا كەشكە جاقىن جايىق وزەنىنەن تابىلعان.
«قازىر قۇزىرلى ورگاندار وسى دەرەك بويىنشا تەكسەرۋ جۇرگىزىپ جاتىر. رينات جانقىلىش 2021 -جىلدىڭ اقپان ايىنان بەرى ماحامبەت اۋدانىنىڭ اكىمى لاۋازىمىن اتقاردى. ول ءوز ءىسىنىڭ كاسىبي مامانى رەتىندە ارىپتەستەرىنىڭ ەسىندە قالادى. اتىراۋ وبلىسىنىڭ اكىمى، بارشا ارىپتەستەرى رينات باۋىرجان ۇلىنىڭ مەزگىلسىز دۇنيەدەن وتۋىنە وراي مارقۇمنىڭ وتباسى مەن جاقىندارىنا قايعىرىپ كوڭىل ايتادى»، - دەلىنگەن وڭىرلىك كوممۋنيكاتسيالار قىزمەتى تاراتقان اقپاراتتا.
بۇدان بۇرىن اتىراۋ وبلىسىندا جايىققا باتقان اۋدان اكىمى ءالى تابىلماعانىن جازعان ەدىك. وبلىستىق توتەنشە جاعدايلار دەپارتامەنتى قوعاممەن بايلانىس توبىنىڭ مالىمەتىنشە، ماحامبەت اۋدانىنىڭ اكىمى 31-شىلدەدە ساعات 20:30 شاماسىندا جايىق وزەنىنە سۋعا تۇسكەن. الايدا، وزەننەن قايتا شىقپاي قالعان. بۇگىن، 1-تامىزدا جەرگىلىكتى ۋاقىتپەن ساعات 6:10 شاماسىندا ىزدەستىرۋ جۇمىستارى باستالدى. ىزدەستىرۋ جۇمىستارىنا توتەنشە جاعدايلار دەپارتامەنتىنەن 9 قىزمەتكەر مەن 2 ءجۇزۋ قۇرالى تارتىلدى. اۋداندىق پوليسيا بولىمىنەن 10 قىزمەتكەر، تۋىستارىنان 15 ادام كومەككە كەلگەن.
رينات جانقىلىش ماحامبەت اۋدانىنىڭ اكىمى لاۋازىمىنا 2021 -جىلعى اقپان ايىندا تاعايىندالعان. ول 1982 -جىلى 2-جەلتوقساندا اتىراۋ قالاسىندا دۇنيەگە كەلگەن. ءبىلىمى جوعارى، 2003 -جىلى قازاق مەملەكەتتىك زاڭ ۋنيۆەرسيتەتىندە، 2011 -جىلى جامبىل گۋمانيتارلىق- تەحنيكالىق ۋنيۆەرسيتەتىندە، ال 2017 -جىلى اتىراۋ مۇناي- گاز ۋنيۆەرسيتەتىندە زاڭگەر، ەكونوميست جانە مۇناي- گاز ءىسى ماماندىعى بويىنشا ءبىلىم العان. ەڭبەك جولىن 2005 -جىلى الماتى قالالىق ەكونوميكالىق جانە سىبايلاس جەمقورلىققا قارسى كۇرەس دەپارتامەنتىندە تەرگەۋشى بولىپ باستاعان. 2006-2018 -جىلدارى بىرنەشە جەكە كاسىپورىندا باسشىلىق ەتكەن. ال، 2018-2019 -جىلدارى اتىراۋ قالاسى ءماسليحاتىنىڭ حاتشىسى، 2019-2020 -جىلدارى اتىراۋ قالاسى اكىمىنىڭ ورىنباسارى لاۋازىمىن اتقارعان.
