تارباعاتايدا ات بايگەسىنەن رەكورد جاڭاردى
«تۇعىرى بيىك تارباعاتاي» فەستيۆالىندە بۇعان دەيىنگى رەكوردتىڭ مۇرتى بۇزىلىپ، كاتونقاراعايدىڭ جۇيرىگى 7 ساعاتتا مارەگە جەتتى. ونەر جانە سپورت شاراسى كەزىندە «اسىل دومبىرا» ايتىسىنىڭ بيىلعى جۇلدەگەرلەرى انىقتالدى. شىعىس توپىراعىندا وسىمەن ەكىنشى مارتە ۇيىمداستىرىلعان «ۇلى دالا قازاناتى» جارىسى بيىل ەرەكشە ءوتتى.
2019 -جىلى 106 جۇيرىك توپقا تۇسسە، بۇل جولى ىرىكتەلگەن 20 تۇلپار سايىستىڭ كورىگىن قىزدىردى. شاباندوزدارعا قولايلى جاعداي جاسالىپ، جول بويىنا بىرنەشە كيىز ءۇي تىگىلدى.
ازامات قاسىم، ءتىلشى:
- كوكپەكتى اۋىلىنان تاڭعى ساعات 4 تە شىققان 17 اتتىڭ، مىنە، العاشقى لەگى كورىندى. 4 ات ءوتىپ بارا جاتىر. 6 ات بولدىرىپ، ورتا جولدان جارىستى اياقتادى. ءبىز تۇرعان جەردەن مارەگە دەيىن ءالى 25 شاقىرىم بار. تاڭ بوزىندا كوكپەكتى اۋىلىنان شىققان تاقىمى تاستاي شاباندوزدار ءتۇس اۋا ەكپىن اۋىلىنداعى اتشابارعا ات باسىن تىرەدى. كاتونقاراعاي اۋدانىنىڭ «تارپاڭ» اتتى ارعىماعى 7 ساعات، 12 سەكۋندتا مارە سىزىعىن قيدى.
سەرگەي رىبين، شاباندوز:
- اقىرىن ارت جاقتا شاۋىپ وتىردىم. سوڭىنا قاراي جەتىپ الدىم. شىنىمدى ايتايىن، ءبىرىنشى ورىن الام دەپ ويلامادىم. الماتىدان كەلگەن اتتار مىقتى ەكەن.
التايدىڭ جۇيرىگى بۇعان دەيىن شىعىستاعى زايسان اۋدانىندا وتكەن 130 شاقىرىمدىق بايگەدە دە توپ جارعان. ونى دا جۇرت ۇمىتا قويعان جوق.
ەربولات توقسانوۆ، ات يەسى:
- ءبىز قىسى- جازى جۇمىس ىستەيمىز. قىستىگۇنى قاسقىرعا، جىلقىعا مىنەمىز. شاناعا جەگەمىز. جۇمىسكەر اتتار عوي. تاماعىن بەرۋ كەرەك. جۇمىسقا سالۋ كەرەك. سوندا مىقتى بولادى.
قايرات ءيىسحان، اۋىل شارۋاشىلىعى عىلىمدارىنىڭ كانديداتى:
- قازاقتىڭ ءتول جىلقىسى. ونىڭ ەرەكشەلىگى، ءمىنىستى، جەگىستى، باعالى، قۇندى جىلقى ەكەنىنە وسى بايگەدە ناقتى كوزىمىز جەتىپ وتىر. ناعىز قازاق جىلقىسى ەكەنى دالەلدەندى.
جارىس ۇيىمداستىرۋشىلارىنىڭ ايتۋىنشا، بيىلعى بايگەدە رەكورد جاڭاردى. بۇل ناتيجە گيننەستىڭ رەكوردتار كىتابىنا ەنۋى ابدەن مۇمكىن.
بادەلحان قامالحان ۇلى، «ۇلى دالا قازاناتى» جارىسىنىڭ ۇيىمداستىرۋشىسى:
- وسىدان ءۇش جىل بۇرىن 7 ساعات، 37 مينۋتتا وتكەن بولاتىن. رەكورد جاڭاردى 24 مينۋتقا. ءبىز گيننەستەر رەكوردىنا ءوتىنىم بەرگەنبىز. پاندەمياعا بايلانىستى توقتاپ قالدى. بۇيىرسا، پاتتەنتتەلىپ، قازاقتىڭ قازاناتى تۇڭعىش رەت 140 شاقىرىمعا شاپتى دەپ الەمگە جار سالۋىمىزعا بولادى.
«تۇعىرى بيىك تارباعاتاي» فەستيۆالىنىڭ سوڭعى كۇنىندە «اسىل دومبىرا» ايتىسىنىڭ جۇلدەگەرلەرى بەلگىلى بولدى. ءسوز سايىسىنىڭ فينالىندا 16 ايتىسكەر كىل مىقتىنىڭ ىشىنەن كىم مىقتىنى انىقتادى. بۇل ايتىستىڭ ەرەكشەلىگى، جەرەبەنى كورەرمەندەردىڭ كوز الدىندا تارتتى.
دۋلات تاستەكەيەۆ، «اسىل دومبىرا» ايتىسىنىڭ دەمەۋشىسى:
- اسىل دومبىرانىڭ ەرەكشەلىگى، جاستارعا مۇمكىندىك بەرەمىز. ولار مۇحتار، رينات، رۇستەم سياقتى تانىمال اقىندارمەن ايتىسىپ، حالىققا تانىلا باستايدى.
مۇحتار نيازوۆ، «اسىل دومبىرا» ايتىسىنىڭ فيناليسى:
- بۇل ايتىس ەرەكشە، سەبەبى، كورەرمەن ەش كۇماندانباي جەرەبەنى ءوز قولىمەن سۋىرىپ، كىممەن- كىمنىڭ ايتىساتىنىن انىقتاپ بەرىپ جاتىر. مەنىڭشە، رۋحاني- مادەني شارالاردىڭ شەت ايماقتاردا كوبىرەك وتكەنى ەلدىڭ ەڭسەسىن تىكتەيدى دەپ ويلايمىن.
ون مىڭنان استام كورەرمەن تاماشالاعان ايتىستىڭ باس جۇلدەسى اسىل تاستارمەن بەزەندىرىلگەن دومبىرا مەن اۆتو كولىكتى رينات زايىتوۆ يەلەندى. ال ءداستۇرلى «اسىلتاس» ستيپەندياسى مۇحتار نيازوۆقا بۇيىردى.
اۆتورلارى: ازامات قاسىم، مەدەت ءومىرحانوۆ، بەرىك جوبالاي ۇلى
www.24.kz
