ۇكىمەت قولجەتىمدى باسپانانى كىلتىمەن ساتىپ الۋ مەحانيزمىن ازىرلەپ جاتىر

نۇر-سۇلتان. قازاقپارات - «نۇرلى جەر» باعدارلاماسى بويىنشا سالىناتىن الەۋمەتتىك تۇرعىن ۇيلەردىڭ كونكۋرستىق پروتسەدۋرالارى وڭتايلاندىرىلماق.

ق ر پرەمەر-ءمينيسترىنىڭ ورىنباسارى رومان سكليار ءماجىلىس دەپۋتاتتارىنىڭ ساۋالىنا بەرگەن جاۋابىندا وسىنداي مالىمەت كەلتىردى، دەپ حابارلايدى قازاقپارات ءتىلشىسى.

«مەملەكەت باسشىسى حالىقتى قولجەتىمدى باسپانامەن قامتىپ، الەۋمەتتىك شيەلەنىستى بولدىرماۋ ءۇشىن وفتەيك-كەلىسىمشارتتار («كىلتىمەن ساتىپ الۋ») ارقىلى كرەديتتىك باسپانا سالىپ، ونى مۇقتاج ازاماتتارعا 2020-2025-جىلدارعا ارنالعان «نۇرلى جەر» مەملەكەتتىك باعدارلاماسىنىڭ باعاسىمەن ساتىپ اپەرۋ مەحانيزمىن ەنگىزۋدى تاپسىرعان بولاتىن. اتالعان مەحانيزمدى ىسكە اسىرۋ ءۇشىن «تۇرعىن ءۇي ساياساتىن رەفورمالاۋ ماسەلەلەرى جونىندەگى زاڭناما اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ اياسىندا ۇكىمەتتىڭ قورىتىندىسى ازىرلەنىپ جاتىر.

ول قورىتىندى بيۋجەت كودەكسىنە تەحنيكالىق تۇرعىدا كۇردەلى ەمەس نىساندار سالۋعا قويىلاتىن شەكتەۋلەردى الىپ تاستايتىن تۇزەتۋلەر ەنگىزۋدى كوزدەيدى.

بۇل تۇزەتۋلەر «كىلتىمەن بەرىلەتىن» نىسانداردى ءبىر ۇيىمنىڭ جوبالاپ، سالۋىنا مۇمكىندىك بەرەتىن ءبىر كونكۋرستىڭ اياسىندا وفتەيك-كەلىسىمشارت جاساۋعا مۇمكىندىك بەرەدى»، - دەپ جازىلعان ۆيتسە-پرەمەردىڭ جاۋابىندا .

ونىڭ پايىمىنشا، وسىنىڭ ارقاسىندا تۇرعىن ءۇي سالۋشىلاردىڭ قولجەتىمدى باسپانا جوبالارىن ىسكە اسىرۋعا قىزىعۋشىلىعى ارتپاق.

كونكۋرس جاريالانعان كەزدە تەحنيكالىق ەرەكشەلىكتەرىمەن بىرگە قاجەتتى پاتەرلەردىڭ ولشەمدەرى مەن سانى كورسەتىلەدى. سونداي-اق، جەر تەلىمى مەن جوبالىق-سمەتالىق قۇجاتتامانىڭ، قۇرىلىس-مونتاج جۇمىستارىنىڭ قۇنى بىرگە ەسەپتەلگەن جالپى سوماسى كورسەتىلەدى.

سونىمەن بىرگە، قۇرىلىستىڭ ساپاسى مەن اشىقتىعىن قامتاماسىز ەتۋ ءۇشىن «ە- قۇرىلىس» جۇيەسى كەزەڭ-كەزەڭمەن ىسكە قوسىلادى.

«جالپى، تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2022-2026-جىلدارعا ارنالعان تۇجىرىمداماسى الەۋمەتتىك كرەديتتىك باسپانا قۇرىلىسىن 1 شارشى مەترگە 290 مىڭ تەڭگە كولەمىندە، سونداي-اق جەكە مەنشىك قۇرىلىس كومپانيالارىن ىنتالاندىرۋ كەزىندە ينجەنەرلىك-كوممۋنيكاتسيالىق ينفراقۇرىلىم قۇرىلىسىن 1 شارشى مەترىنە 310 مىڭ تەڭگەگە دەيىن قارجىلاندىرۋ كوزدەلگەن. بۇگىنگى مەملەكەتتىك ساتىپ الۋدىڭ مودەلى ينجەنەرلىك-كومۋنيكاتسيالىق ينفراقۇرىلىم نىساندارىن جوبالاۋ بويىنشا جەكە باسپانا مەن الەۋمەتتىك ينفراقۇرىلىم قۇرىلىسى بويىنشا جەكە كونكۋرس جۇرگىزۋدى قاجەت ەتەتىنىن ايتۋ كەرەك. بۇل كونكۋرس پروتسەدۋرالارىن ۇزارتىپ، نىسانداردىڭ قولدانىسقا بەرۋ مەرزىمىن كەشىكتىرەدى»، - دەلىنگەن جاۋاپتا.

ەسكە سالساق، قازاقستاندا جاڭا تۇرعىن ءۇي ساياساتى ىسكە اسىرىلا باستادى.