قاڭتار وقيعاسىن ۇيىمداستىرۋشىلار قوعامدىق-ساياسي جاعدايدىڭ شيەلەنىسكەنىن قالاعان
بۇل تۋرالى ق ر ءى ءى م تەرگەۋ دەپارتامەنتى باستىعىنىڭ ورىنباسارى مۇحتار قوجايەۆ ايتتى، دەپ حابارلايدى قازاقپارات ءتىلشىسى.
«قايعىلى وقيعالار بارىسىندا كوپتەگەن ازامات زارداپ شەكتى. ولاردىڭ ءبىرقاتارى جاپپاي تارتىپسىزدىكتەردى ۇيىمداستىرۋشىلار مەن ارانداتۋشىلاردىڭ ىقپالىنا ەرىپ، قىلمىس جاساۋعا بارعان. ناتيجەسىندە، مەملەكەتتىك ورگانداردىڭ 71 عيماراتى، 700 دەن استام اۆتوكولىك جويىلىپ زاقىمدالعان. ونىڭ ىشىندە جەدەل جاردەم، پوليتسيا جانە ورتكە قارسى قىزمەتتەردىڭ كولىكتەرى دە بار»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.
مۇحتار قوجايەۆتىڭ دەرەگىنشە، 1,5 مىڭنان استام بيزنەس نىساندارى زارداپ شەكتى. ولارعا اسا ءىرى مولشەردە شىعىن كەلتىرىلدى.
«ەڭ وكىنىشتىسى - ازاماتتار مەن كۇش قۇرىلىمدارىنىڭ قىزمەتكەرلەرى قازا تاپتى. وسى سالداردىڭ بارلىعى تەررورلىق شابۋىلدار مەن جاپپاي تارتىپسىزدىكتەردى ۇيىمداستىرۋشىلارعا ايىپ رەتىندە تاعىلۋى ءتيىس دەپ ويلايمىز، سەبەبى ولار ءدال وسىنداي زارداپتىڭ بولۋىن الدىن-الا بولجاپ بىلگەن. سونداي-اق ەلدەگى قالىپتى قوعامدىق-ساياسي جاعدايدىڭ شيەلەنىسىپ، تۇراقسىزدانۋىن قالاعان»، - دەدى دەپارتامەنت باستىعىنىڭ ورىنباسارى.
